خادم الحرمین کی سرپرستی میں چھٹا سعودی میڈیا فورم 2027 میں ریاض میں ہوگا

خادم الحرمین الشریفین شاہ سلمان بن عبدالعزیز آل سعود کی سرپرستی میں سعودی میڈیا فورم کا چھٹا ایڈیشن 24 تا 26 شعبان 1448ھ، مطابق یکم تا 3 فروری 2027 کو ریاض میں منعقد ہوگا۔ اس موقع پر دنیا بھر سے میڈیا رہنماؤں، فیصلہ سازوں، ماہرین اور میڈیا و ٹیکنالوجی اداروں کی بڑی تعداد شرکت کرے گی۔

اس موقع پر وزیر اطلاعات سلمان بن یوسف الدوسری نے خادم الحرمین الشریفین اور ولی عہد و وزیراعظم کا شکریہ ادا کیا اور کہا کہ فورم کی شاہی سرپرستی قیادت کی میڈیا سیکٹر کی ترقی میں دلچسپی اور عالمی سطح پر مملکت کے مقام کو مضبوط بنانے کی عکاس ہے۔ انہوں نے کہا کہ فورم کی سابقہ کامیابیوں اور اس کے مثبت قومی و بین الاقوامی اثرات نے اسے مزید معتبر بنایا ہے اور یہ میڈیا انڈسٹری کی حمایت اور مستقبل کے امکانات کے لیے اہم کردار ادا کر رہا ہے۔

وزیر اطلاعات نے مزید کہا کہ فورم نے خود کو خطے کی نمایاں میڈیا پلیٹ فارم کے طور پر منوایا ہے اور یہ عالمی سطح پر مکالمے، میڈیا کے مستقبل کی پیش بینی، منفرد اقدامات کے آغاز اور بین الاقوامی شراکت داریوں کے فروغ کا مرکز بن چکا ہے۔ اس میں میڈیا کے رہنما، فیصلہ ساز اور عالمی ماہرین جمع ہوتے ہیں، جو جدید میڈیا اور ٹیکنالوجی میں تیزی سے آنے والی تبدیلیوں کے ساتھ ہم آہنگی، اختراع کی حمایت، قومی صلاحیتوں کو بااختیار بنانے اور مملکت کو عالمی میڈیا انڈسٹری کا مرکز بنانے میں اہم کردار ادا کر رہے ہیں، جو سعودی وژن 2030 کے اہداف سے ہم آہنگ ہے۔