سعودی عرب میں آج گرج چمک کے ساتھ بارش اور تیز ہوائیں متوقع

محکمہ موسمیات نے اپنی رپورٹ میں بتایا ہے کہ آج بدھ کو جازان، عسیر، الباحہ اور مکہ مکرمہ کے کچھ حصوں میں درمیانے سے شدید درجے کی گرج چمک کے ساتھ بارشیں متوقع ہیں، جو سیلابی ریلوں کا سبب بن سکتی ہیں۔ ان بارشوں کے ساتھ ژالہ باری اور تیز ہوائیں بھی چلیں گی۔ ان علاقوں میں بعض مقامات پر دھند چھا جانے کا امکان ہے، جس سے مشرقی ریجن خصوصاً ساحلی علاقوں میں حد نگاہ انتہائی کم ہو سکتی ہے۔ اس کے علاوہ حائل، شمالی سرحدی علاقہ اور مشرقی ریجن کے بعض حصوں میں بھی گرد آلود ہوائیں اور گرج چمک کے ساتھ بارش کا امکان برقرار ہے۔

رپورٹ کے مطابق بحیرہ احمر کے شمالی حصے میں سطحی ہوائیں شمال مغرب سے شمال کی سمت 20 سے 40 کلومیٹر فی گھنٹہ کی رفتار سے چلیں گی، جو خلیج عقبہ کی طرف 50 کلومیٹر فی گھنٹہ تک پہنچ سکتی ہیں۔ درمیانی حصے میں ہوائیں شمال مغرب سے مغرب کی سمت 20 سے 40 کلومیٹر فی گھنٹہ جبکہ جنوبی حصے میں شمال مغرب سے جنوب مغرب کی سمت 15 سے 30 کلومیٹر فی گھنٹہ رہیں گی، جو گرج چمک کے ساتھ بارش کے دوران 60 کلومیٹر فی گھنٹہ سے بھی تجاوز کر سکتی ہیں۔ شمالی حصے میں موجوں کی اونچائی ایک سے دو میٹر تک رہے گی اور خلیج عقبہ کی طرف دو میٹر سے زیادہ ہو سکتی ہے۔ درمیانی حصے میں ایک سے دو میٹر جبکہ جنوبی حصے میں آدھے میٹر سے ایک میٹر تک اور گرج چمک کے ساتھ بارش کے دوران دو میٹر سے زیادہ ہو سکتی ہے۔

بحیرہ احمر کے شمالی حصے میں سمندر کی حالت درمیانی سے تیز موجوں والی، درمیانی حصے میں ہلکی سے درمیانی اور جنوبی حصے میں ہلکی سے درمیانی رہے گی، جبکہ گرج چمک کے ساتھ بارش کے دوران جنوبی حصے میں موجیں تیز ہو سکتی ہیں۔

خلیج عرب میں ہوائیں دن کے وقت جنوب یا جنوب مغرب کی سمت 10 سے 25 کلومیٹر فی گھنٹہ کی رفتار سے چلیں گی، جبکہ شام کے وقت شمال مشرق یا شمال مغرب کی سمت ہو جائیں گی۔ جنوبی حصے میں ہوائیں مشرق یا شمال مشرق کی سمت 10 سے 25 کلومیٹر فی گھنٹہ کی رفتار سے چلیں گی، جو گرج چمک کے ساتھ بارش کے دوران 50 کلومیٹر فی گھنٹہ تک پہنچ سکتی ہیں۔ شمالی حصے میں موجوں کی اونچائی آدھے میٹر سے ایک میٹر تک اور جنوبی حصے میں آدھے میٹر سے ایک میٹر تک رہے گی، جو گرج چمک کے ساتھ بارش کے دوران دو میٹر سے زیادہ ہو سکتی ہے۔ شمالی حصے میں سمندر کی حالت ہلکی موجوں والی اور جنوبی حصے میں ہلکی سے تیز موجوں والی رہے گی۔