سعودی ترقیاتی فنڈ کا اردن میں فلسطینی پناہ گزینوں کی حمایت کا جائزہ

سعودی ترقیاتی فنڈ نے اردن میں فلسطینی پناہ گزینوں کے لیے مملکت سعودی عرب کی جانب سے فراہم کردہ ترقیاتی امداد کے اثرات کا جائزہ لیا۔ اس موقع پر فنڈ کے چیف ایگزیکٹو سلطان بن عبدالرحمن المرشد اور اقوام متحدہ کی ایجنسی برائے فلسطینی پناہ گزین (اونروا) کے قائم مقام کمشنر جنرل کرسچین سانڈرز نے مشترکہ دورہ کیا۔

اس دورے میں عمان کے نئے کیمپ میں قائم مڈل اسکول اور الزہور ہیلتھ سینٹر کے منصوبے شامل تھے، جن میں سعودی عرب کے نائب سفیر برائے اردن محمد مونس بھی شریک ہوئے۔ یہ منصوبے سعودی ترقیاتی فنڈ کی مالی معاونت سے مملکت کی جانب سے فلسطینی پناہ گزینوں کی مسلسل امداد اور ان کی زندگیوں میں بہتری کے لیے شروع کیے گئے ہیں۔

تعلیم، صحت اور انفراسٹرکچر میں ترقیاتی کوششیں

فنڈ کے چیف ایگزیکٹو نے بتایا کہ اس دورے سے اونروا کے ساتھ شراکت میں مکمل کیے گئے منصوبوں کے اثرات کا جائزہ لینے کا موقع ملا۔ انہوں نے کہا کہ سعودی امداد نے اہم انفراسٹرکچر کو مضبوط بنانے، تعلیم، صحت اور بنیادی سہولیات کی فراہمی میں نمایاں کردار ادا کیا ہے۔

اونروا کے قائم مقام کمشنر جنرل نے بھی سعودی عرب کے ساتھ جاری شراکت داری کو سراہتے ہوئے کہا کہ انفراسٹرکچر میں سرمایہ کاری نے پناہ گزینوں کی رہائش اور کام کے ماحول پر مثبت اثرات مرتب کیے ہیں اور تعلیم، صحت اور دیگر اہم خدمات کی فراہمی میں مدد دی ہے۔

سعودیہ اور اردن کے درمیان ترقیاتی تعاون کا فروغ

واضح رہے کہ سعودی ترقیاتی فنڈ نے اونروا کے ساتھ مل کر تعلیم، صحت، انفراسٹرکچر اور سماجی شعبوں میں فلسطینی عوام کے لیے متعدد ترقیاتی منصوبے اور پروگرام مکمل کیے ہیں۔ دورے کے دوران فنڈ کے چیف ایگزیکٹو نے اردن کی وزیر منصوبہ بندی و بین الاقوامی تعاون زینہ طوقان سے بھی ملاقات کی اور دونوں جانب سے فنڈ کے زیر اہتمام ترقیاتی منصوبوں اور باہمی تعاون کے فروغ پر تبادلہ خیال کیا گیا۔