جازان میں سرحدی قوانین کی خلاف ورزی پر شہری گرفتار

جازان ریجن میں جنرل ڈائریکٹوریٹ آف مجاہدین کی گشتی ٹیموں نے ایک سعودی شہری کو اس وقت گرفتار کیا جب وہ اپنی گاڑی میں سرحدی قوانین کی خلاف ورزی کرنے والے یمنی باشندے کو منتقل کر رہا تھا۔ دونوں افراد کو حراست میں لے کر ان کے خلاف قانونی کارروائی شروع کر دی گئی ہے، جبکہ یمنی شہری کو متعلقہ ادارے کے حوالے اور سعودی شہری کو پبلک پراسیکیوشن کے سپرد کر دیا گیا ہے۔

جنرل ڈائریکٹوریٹ آف مجاہدین کے ترجمان نے واضح کیا کہ جو بھی شخص مملکت میں سرحدی قوانین کی خلاف ورزی کرنے والوں کے داخلے میں سہولت فراہم کرے، انہیں ملک کے اندر منتقل کرے، پناہ دے یا کسی بھی شکل میں مدد یا خدمت فراہم کرے، وہ سخت سزاؤں کا مستحق ہوگا۔ ان سزاؤں میں پندرہ سال تک قید، ایک ملین سعودی ریال تک جرمانہ، نقل و حمل اور رہائش کی ضبطی اور تشہیر شامل ہیں۔

اعرض التغريدة على منصة X

انہوں نے مزید کہا کہ یہ جرم بڑی اور قابل گرفتاری جرائم میں شمار ہوتا ہے، جو دیانت اور امانت کے منافی ہے۔ انہوں نے شہریوں سے اپیل کی کہ اقامہ، لیبر اور سرحدی قوانین کی خلاف ورزی کرنے والوں کی اطلاع مکہ مکرمہ، مدینہ منورہ، ریاض اور مشرقی ریجن میں 911 اور دیگر علاقوں میں 999 یا 996 پر دیں۔ تمام اطلاعات مکمل رازداری کے ساتھ لی جائیں گی اور اطلاع دینے والے پر کوئی ذمہ داری عائد نہیں ہوگی۔