سعودی عرب کے مختلف علاقوں میں گرج چمک کے ساتھ بارش کا امکان

محکمہ موسمیات نے آج کے موسم کی رپورٹ میں پیش گوئی کی ہے کہ جازان، عسیر، الباحہ اور مکہ مکرمہ کے بعض حصوں میں درمیانے سے شدید درجے کی گرج چمک کے ساتھ بارشیں ہوں گی، جن سے سیلابی صورتحال پیدا ہو سکتی ہے۔ ان بارشوں کے ساتھ تیز ہوائیں اور ژالہ باری بھی متوقع ہے۔ مدینہ منورہ کے کچھ حصوں میں ہلکی سے درمیانے درجے کی بارش کا امکان ہے۔ ان علاقوں کے علاوہ تبوک، حائل اور القصیم کے بعض حصوں میں بھی دھند چھا سکتی ہے۔ مشرقی ریجن اور ریاض کے کچھ حصوں میں گرد آلود ہوائیں چلنے کی توقع ہے۔

رپورٹ کے مطابق بحیرہ احمر میں شمالی حصے میں سطحی ہوائیں شمال مغرب سے شمال مشرق کی سمت 15 سے 30 کلومیٹر فی گھنٹہ کی رفتار سے چلیں گی۔ درمیانی حصے میں شمال مغرب سے جنوب مغرب کی سمت 15 سے 30 کلومیٹر فی گھنٹہ کی رفتار سے چلیں گی، جو بعض اوقات 50 کلومیٹر فی گھنٹہ سے تجاوز کر سکتی ہیں۔ جنوبی حصے میں جنوب مشرق سے جنوب مغرب کی سمت 15 سے 30 کلومیٹر فی گھنٹہ کی رفتار سے چلیں گی، جو بعض اوقات 60 کلومیٹر فی گھنٹہ سے زیادہ ہو سکتی ہیں۔ سمندر میں لہروں کی اونچائی آدھے میٹر سے ڈیڑھ میٹر تک رہے گی، جو بعض اوقات دو میٹر سے بھی زیادہ ہو سکتی ہے۔ سمندر کی حالت ہلکی سے درمیانی اور بعض اوقات شدید لہروں والی رہے گی۔

خلیج عرب میں شمالی حصے میں ہوائیں شمال مغرب سے شمال کی سمت 20 سے 40 کلومیٹر فی گھنٹہ کی رفتار سے چلیں گی، جبکہ جنوبی حصے میں شمال مغرب سے شمال کی سمت 20 سے 45 کلومیٹر فی گھنٹہ کی رفتار سے چلیں گی۔ یہاں لہروں کی اونچائی ڈیڑھ میٹر سے دو میٹر تک رہے گی اور سمندر کی حالت درمیانی لہروں والی ہوگی۔