قطر کی حوثیوں کی جانب سے مکہ مکرمہ پر حملے کی مذمت

قطر نے حوثی گروپ کی جانب سے مکہ مکرمہ کو ڈرون کے ذریعے نشانہ بنانے کی کوشش کی شدید ترین الفاظ میں مذمت کی ہے۔ قطر نے کہا کہ بیت اللہ الحرام کی حرمت کو نشانہ بنانا ایک جارحانہ عمل اور مذہبی، اخلاقی و انسانی سرخ لکیر کی سنگین خلاف ورزی ہے۔

قطری وزارت خارجہ نے واضح کیا کہ مکہ مکرمہ کو نشانہ بنانے کی کوشش دنیا بھر کے ایک ارب سے زائد مسلمانوں کے جذبات کو کھلا چیلنج ہے۔ وزارت نے کہا کہ مقدس مقامات کی حرمت، ان کا تحفظ اور زائرین کی سلامتی کسی صورت خطرے میں نہیں ڈالی جا سکتی اور نہ ہی انہیں کسی تنازع میں استعمال کیا جا سکتا ہے۔

وزارت نے مزید کہا کہ مکہ مکرمہ اور مقدس مقامات کو خطرے میں ڈالنا نہایت سنگین اشتعال انگیزی اور ان کی مذہبی و روحانی حیثیت کی کھلی توہین ہے، جو تمام مسلمانوں کے دلوں میں ہے۔

اسی تناظر میں قطر نے سعودی عرب سے مکمل یکجہتی اور اس کے تمام اقدامات و تدابیر کی حمایت کا اعادہ کیا ہے جو وہ اپنی سرزمین، اسلامی مقدسات اور ضیوف الرحمن کے تحفظ کے لیے کر رہا ہے۔

قطری وزارت خارجہ نے اس اعتماد کا اظہار کیا کہ سعودی عرب حرمین شریفین کے تحفظ اور ہر قسم کے خطرے سے نمٹنے کی مکمل صلاحیت رکھتا ہے۔ وزارت نے دوحہ کے اس موقف کو دہرایا کہ وہ شہریوں اور مقدس مقامات کو نشانہ بنانے کی ہر کوشش کو مسترد کرتی ہے اور مقدسات کی حرمت کے احترام اور انہیں علاقائی تنازعات سے دور رکھنے کی اپیل کرتی ہے۔