سعودی عرب کے مختلف علاقوں میں شدید گرمی اور بارش کی پیش گوئی

قومی مرکز برائے موسمیات نے اپنی روزانہ رپورٹ میں کہا ہے کہ آج جمعہ کو مملکت کے مشرقی علاقے شدید گرمی کی لپیٹ میں رہیں گے، جبکہ جنوبی حصوں میں ہلکی بارش کا امکان ہے۔

رپورٹ کے مطابق شمالی سرحدی علاقہ، الجوف، تبوک اور مدینہ منورہ کے بعض حصوں میں گرد آلود اور تیز ہواؤں کا سلسلہ جاری رہے گا، جس کے باعث ریاض اور نجران کے کچھ علاقوں سمیت مغربی اور جنوب مغربی بلند علاقوں کے مشرقی حصوں میں حد نگاہ متاثر ہو سکتی ہے۔

مرکز نے مزید بتایا کہ مکہ مکرمہ، الباحہ، عسیر، جازان اور نجران کے پہاڑی علاقوں میں آج بھی گرج چمک کے ساتھ بارش، ژالہ باری اور تیز ہواؤں کا امکان برقرار ہے۔

سمندر اور ہواؤں کی صورتحال

بحیرہ احمر کے حوالے سے رپورٹ میں کہا گیا ہے کہ سطحی ہوائیں شمال مغرب سے جنوب مغرب کی سمت 10 سے 30 کلومیٹر فی گھنٹہ کی رفتار سے چلیں گی، جبکہ جنوبی حصے میں گرج چمک کے ساتھ بارش کے دوران رفتار 50 کلومیٹر فی گھنٹہ سے بھی تجاوز کر سکتی ہے۔ لہروں کی اونچائی آدھے میٹر سے ڈیڑھ میٹر تک رہے گی، جو گرج چمک کے دوران دو میٹر سے بھی زیادہ ہو سکتی ہے۔ سمندر کی کیفیت عمومی طور پر ہلکی سے معتدل اور بعض اوقات تیز لہروں والی رہے گی۔

خلیج عرب میں سطحی ہوائیں شمال مغرب سے شمال مشرق کی سمت 13 سے 27 کلومیٹر فی گھنٹہ کی رفتار سے چلیں گی، جبکہ لہروں کی اونچائی آدھے میٹر سے ایک میٹر تک رہے گی اور سمندر عمومی طور پر ہلکی لہروں والا رہے گا۔