سعودی عرب کے مختلف علاقوں میں آج تیز بارش اور گرد آلود ہوائیں متوقع

محکمہ موسمیات نے آج کے موسم کی رپورٹ میں بتایا ہے کہ جازان، عسیر اور باحہ کے بعض حصوں میں درمیانے سے شدید درجے کی گرج چمک کے ساتھ بارشیں جاری رہیں گی، جن کے باعث سیلابی ریلے بھی آ سکتے ہیں اور بعض مقامات پر ژالہ باری کا امکان ہے۔ جبکہ مکہ مکرمہ، مدینہ منورہ اور نجران کے کچھ علاقوں میں ہلکی سے درمیانے درجے کی بارش متوقع ہے۔ اس کے علاوہ ان علاقوں سمیت تبوک، حائل، الجوف اور شمالی سرحدی علاقوں میں گرد آلود اور تیز ہوائیں چلنے کی توقع ہے۔ رپورٹ میں مزید کہا گیا ہے کہ مکہ مکرمہ، مدینہ منورہ اور مشرقی ریجن کے ساحلی علاقوں میں رات اور صبح کے اوقات میں دھند چھا سکتی ہے۔

رپورٹ کے مطابق بحیرہ احمر میں سطحی ہوائیں شمالی سے شمال مغربی سمت میں 18 سے 40 کلومیٹر فی گھنٹہ، شمال مغربی سے مغربی سمت میں 10 سے 35 کلومیٹر فی گھنٹہ اور جنوبی مشرقی سے جنوبی مغربی سمت میں 10 سے 32 کلومیٹر فی گھنٹہ کی رفتار سے چلیں گی، جبکہ گرج چمک کے ساتھ بارش کے دوران رفتار 50 کلومیٹر فی گھنٹہ سے بھی بڑھ سکتی ہے۔ سمندر میں لہروں کی اونچائی آدھے میٹر سے ڈیڑھ میٹر تک اور گرج چمک کے ساتھ دو میٹر سے زیادہ ہو سکتی ہے۔ اس دوران سمندر کی کیفیت ہلکی سے درمیانی اور بارش کے دوران تیز لہروں والی رہے گی۔

خلیج عرب میں سطحی ہوائیں شمال مغربی سے مغربی سمت میں 12 سے 30 کلومیٹر فی گھنٹہ اور شمال مغربی سے جنوبی مغربی سمت میں 10 سے 30 کلومیٹر فی گھنٹہ کی رفتار سے چلیں گی۔ لہروں کی اونچائی آدھے میٹر سے ایک میٹر تک اور سمندر کی کیفیت ہلکی لہروں والی رہے گی۔