سعودی عرب میں آج بارش اور تیز ہوائیں متوقع

محکمہ موسمیات نے آج کے موسم کی رپورٹ میں بتایا ہے کہ جازان، عسیر، باحہ، مکہ مکرمہ اور مدینہ منورہ کے بعض حصوں میں درمیانے سے شدید درجے کی گرج چمک کے ساتھ بارشیں جاری رہیں گی، جس سے سیلابی صورتحال پیدا ہو سکتی ہے اور ژالہ باری بھی متوقع ہے۔ اسی طرح تبوک، حائل، الجوف اور شمالی سرحدی علاقوں میں بھی گرج چمک والے بادل بننے کا امکان ہے، جبکہ ان علاقوں میں گرد و غبار اور تیز ہوائیں چلنے کی توقع ہے۔

رپورٹ کے مطابق بحیرہ احمر میں سطحی ہوائیں شمال مغرب سے شمال کی سمت 20 سے 45 کلومیٹر فی گھنٹہ کی رفتار سے چلیں گی، جبکہ کچھ حصوں میں شمال مغرب سے جنوب مغرب کی سمت 15 سے 35 کلومیٹر فی گھنٹہ تک رہیں گی اور گرج چمک والے بادلوں کے ساتھ یہ رفتار 50 کلومیٹر فی گھنٹہ سے بھی تجاوز کر سکتی ہے۔ موجوں کی اونچائی آدھے میٹر سے ڈیڑھ میٹر تک رہے گی اور گرج چمک والے بادلوں کے ساتھ دو میٹر سے بھی زیادہ ہو سکتی ہے۔ اس دوران سمندر کی کیفیت ہلکی سے درمیانی اور گرج چمک والے بادلوں کے ساتھ تیز لہروں والی ہو سکتی ہے۔

خلیج عرب میں سطحی ہوائیں شمال مغرب سے شمال مشرق کی سمت 10 سے 30 کلومیٹر فی گھنٹہ کی رفتار سے چلیں گی، موجوں کی اونچائی آدھے میٹر سے ایک میٹر تک رہے گی اور سمندر کی کیفیت ہلکی لہروں والی ہوگی۔