ولی عہد کی زیر صدارت جدہ میں کابینہ اجلاس، 15 اہم فیصلے

ولی عہد، وزیراعظم شہزادہ محمد بن سلمان بن عبدالعزیز آل سعود نے منگل کو جدہ میں کابینہ کے اجلاس کی صدارت کی۔

اجلاس کے آغاز میں، ولی عہد نے کابینہ کو امریکی صدر ڈونلڈ ٹرمپ سے ہونے والی ٹیلیفونک گفتگو کی تفصیلات سے آگاہ کیا، جس میں خطے کی تازہ صورتحال اور اس کے مختلف پہلوؤں پر تبادلہ خیال کیا گیا۔ سعودی عرب نے کشیدگی کم کرنے کے لیے مکالمے کی اہمیت اور علاقائی سلامتی و استحکام کے لیے سفارتی حل کی ضرورت پر زور دیا۔

ولی عہد نے کابینہ کو بحرین کے بادشاہ حمد بن عیسیٰ آل خلیفہ، شام کے صدر احمد الشرع، ترکی کے صدر رجب طیب اردوان اور اسپین کے وزیراعظم پیدرو سانچیز سے ہونے والے رابطوں سے بھی آگاہ کیا، جن میں دوطرفہ تعاون اور باہمی دلچسپی کے امور پر گفتگو ہوئی۔

قائم مقام وزیر اطلاعات و وزیر تعلیم یوسف بن عبداللہ البنیان نے اجلاس کے بعد سعودی خبر رساں ایجنسی کو بتایا کہ کابینہ نے سعودی عرب کی قیادت میں بننے والے کثیر ملکی بحری دفاعی اتحاد میں عالمی حمایت کو سراہا، جو بحیرہ احمر، باب المندب اور خلیج عدن میں جہاز رانی، تجارت اور توانائی کی فراہمی کے تحفظ کے لیے قائم کیا گیا ہے۔

کابینہ نے غزہ میں اسلحہ کی بے دخلی سے متعلق تاریخی معاہدے کو مکمل امن منصوبے کی جانب اہم پیش رفت قرار دیا، جس سے فلسطینی عوام کو اپنے مستقبل کے تعین اور آزاد ریاست کے قیام کا حق ملے گا۔ اس ضمن میں مصر، قطر، ترکی، امریکہ اور امن کونسل کی کوششوں کو سراہا گیا۔

کابینہ نے اعلان کیا کہ اپریل میں ریاض میں پانچواں بین الاقوامی انسانی فورم منعقد کیا جائے گا، جو عالمی سطح پر امدادی سرگرمیوں اور اس شعبے میں پائیدار شراکت داری کے فروغ کے لیے ایک اہم پلیٹ فارم بن چکا ہے۔

کابینہ نے مختلف قومی پروگراموں اور حکمت عملیوں کی رپورٹس اور اعداد و شمار کا جائزہ لیا اور ضیوف الرحمن پروگرام کی کامیابیوں کو سراہا، جس کے تحت حجاج و معتمرین کو اعلیٰ ترین سہولیات فراہم کرنے کے لیے مسلسل اقدامات کیے جا رہے ہیں۔

وزیر نے بتایا کہ کابینہ نے بین الاقوامی مالیاتی فنڈ کی 2026 کی رپورٹ میں سعودی معیشت کی مضبوطی اور چیلنجز سے نمٹنے کی صلاحیت کو سراہا، جس میں وژن 2030 کے تحت ہونے والی اصلاحات اور مختلف شعبوں میں نمایاں پیش رفت کو اجاگر کیا گیا۔

کابینہ نے اپنے ایجنڈے میں شامل مختلف امور اور شوریٰ کونسل کی سفارشات کا جائزہ لیا اور متعلقہ کمیٹیوں کی رپورٹس کی روشنی میں درج ذیل فیصلے کیے:

اول:

سعودی عرب اور ایکواڈور کے درمیان عمومی تعاون کے معاہدے کی منظوری۔

دوم:

سعودی عرب اور قازقستان کے درمیان سرمایہ کاری کے تحفظ و فروغ کے معاہدے کی منظوری۔

سوم:

سعودی عرب اور اسپین کے درمیان شہری ہوابازی میں تعاون کے لیے مفاہمتی یادداشت کی منظوری۔

چہارم:

سعودی عرب اور صومالیہ کے درمیان بحری نقل و حمل میں تعاون کے معاہدے کی منظوری۔

پنجم:

وزیر تعلیم کو کوریا کے ساتھ تکنیکی و پیشہ ورانہ تربیت میں تعاون کے لیے مفاہمتی یادداشت پر مذاکرات اور دستخط کا اختیار دینا۔

ششم:

سعودی اور ترک خلائی ایجنسیوں کے درمیان بیرونی خلا کے پرامن استعمال میں تعاون کی یادداشت کی منظوری۔

ہفتم:

حکومتی خریداری و مسابقت کے نظام کی منظوری۔

ہشتم:

بین الاقوامی مرکز برائے مصنوعی ذہانت کی تحقیق و اخلاقیات کے بنیادی نظام کی منظوری۔

نہم:

رہائشی منصوبوں کے لیے سرمایہ کار کو اراضی کی ترقی اور یونٹس کی تعمیر کے بدلے اراضی میں حصہ داری کی اجازت۔

دہم:

وزارت داخلہ کے طبی شعبے کی بین الاقوامی اسپتال فیڈریشن میں شمولیت کی منظوری۔

یازدہم:

وزارت سرمایہ کاری سے لائسنس یافتہ مالیاتی اداروں کے علاقائی دفاتر کو سرحد پار مالی سرگرمیوں کی اجازت۔

دوازدہم:

غیر دستاویزی جائیدادوں کی اصلاح کے لیے مدت میں ایک سال کی توسیع۔

سیزدہم:

جامعات (حائل، طیبہ، قصیم، الجوف) کے سابقہ مالی سالوں کے حتمی حسابات کی منظوری۔

چہار دہم:

کابینہ کے ایجنڈے میں شامل متعدد امور پر ضروری اقدامات کی ہدایت، جن میں سعودی ایکریڈیشن سینٹر اور جامعات (المجمعہ، الباحہ) کی سالانہ رپورٹس شامل ہیں۔

پانزدہم:

چودہویں گریڈ پر درج ذیل افسران کی ترقی کی منظوری:

ــ بسام بن عبدالرحمن العمار کو وزارت داخلہ میں قانونی مشیر کے طور پر ترقی۔

ــ ڈاکٹر خالد بن سعید ابو ہتلہ کو وزارت اطلاعات میں بزنس کنسلٹنٹ کے طور پر ترقی۔

ــ خالد بن صالح آل شیخ کو کابینہ سیکرٹریٹ میں قانونی مشیر کے طور پر ترقی۔