جدہ، خمیس مشیط، ینبع سمیت کئی شہروں میں سول ڈیفنس کا ہنگامی انتباہ

سول ڈیفنس نے اعلان کیا ہے کہ قومی ہنگامی انتباہی پلیٹ فارم کے ذریعے جدہ، خمیس مشیط، ینبع، طائف، ابہا اور جازان میں ہنگامی انتباہ جاری کیا گیا ہے۔ شہریوں اور مقیمین کو ممکنہ خطرے سے خبردار کرتے ہوئے ہدایت کی گئی ہے کہ وہ اپنی سلامتی کے لیے سرکاری ہدایات پر عمل کریں۔

سول ڈیفنس نے وضاحت کی کہ شہری پرسکون رہیں اور فوری طور پر کسی قریبی محفوظ جگہ، عمارت یا اندرونی کمرے میں چلے جائیں، جو کھڑکیوں سے دور ہو، اور خطرہ ختم ہونے تک وہیں رہیں۔ مزید کہا گیا کہ ہنگامی صورتحال کے خاتمے کی تصدیق کے بغیر گھر یا عمارت سے باہر نہ نکلیں۔

مزید پڑھیں: سول ڈیفنس: خمیس مشیط میں خطرے کے انتباہ کا اجرا

انتباہ کے دوران حفاظتی ہدایات

سول ڈیفنس نے ہدایت کی کہ کھلی جگہوں اور شیشے سے دور رہیں، بالکونی یا چھت پر نہ کھڑے ہوں۔ باہر موجود افراد کو مشورہ دیا گیا کہ وہ قریبی عمارت میں داخل ہو جائیں یا کسی مضبوط دیوار کے پیچھے پناہ لیں۔

اسی حوالے سے، سول ڈیفنس نے تاکید کی کہ انتباہی پیغام ملتے ہی ہجوم سے گریز کریں اور ہرگز ویڈیو یا تصاویر نہ بنائیں، نیز خطرناک مقامات سے دور رہیں۔ اگر ڈرائیونگ کے دوران انتباہ ملے تو گاڑی کو سڑک کے کنارے، پلوں اور بلند عمارتوں سے دور روک لیں۔

ہنگامی صورتحال میں رابطہ

متعلقہ حکام نے واضح کیا ہے کہ کسی بھی خطرے کی صورت میں مکہ مکرمہ، مدینہ منورہ، ریاض اور مشرقی ریجن میں ہنگامی نمبر 911 اور مملکت کے دیگر علاقوں میں 998 پر رابطہ کریں۔