ریاض اور نجران میں سول ڈیفنس کا ہنگامی انتباہ جاری

سعودی محکمہ سول ڈیفنس نے اعلان کیا ہے کہ ریاض اور نجران میں ہنگامی حالات کے لیے قومی ابتدائی انتباہی پلیٹ فارم کے ذریعے خطرے سے متعلق انتباہ جاری کیا گیا ہے، جو آج جمعرات کی شام جاری ہوا۔

سول ڈیفنس نے شہریوں سے اپیل کی ہے کہ وہ پرسکون رہیں، سرکاری ہدایات پر عمل کریں اور فوراً قریبی محفوظ عمارت یا اندرونی کمرے میں چلے جائیں، کھڑکیوں سے دور رہیں اور خطرہ ختم ہونے تک وہیں قیام کریں۔ اس سے قبل گھر یا عمارت سے باہر نہ نکلیں۔

محکمہ نے مزید ہدایت کی ہے کہ کھلی جگہوں اور شیشے سے دور رہیں، بالکونی یا چھت پر کھڑے نہ ہوں، باہر موجود افراد قریبی عمارت میں داخل ہو جائیں یا کسی مضبوط دیوار کے پیچھے پناہ لیں، ہجوم اور تصویربرداری سے گریز کریں اور خطرناک مقامات سے دور رہیں۔

اگر کوئی شخص انتباہی پیغام موصول ہونے کے وقت گاڑی چلا رہا ہو تو اسے چاہیے کہ وہ پلوں اور بلند عمارتوں سے دور سڑک کے کنارے رک جائے۔ کسی بھی خطرے کی صورت میں ریاض میں 911 اور نجران میں 998 پر ایمرجنسی نمبر پر اطلاع دیں اور سرکاری ذرائع سے ہدایات حاصل کریں۔

سول ڈیفنس نے خبردار کیا ہے کہ میزائل یا ڈرون حملوں اور ان کے گرنے کی جگہوں سے متعلق تصاویر یا معلومات کی اشاعت یا شیئرنگ قانونی کارروائی کا باعث بن سکتی ہے۔