قطر کا سعودی عرب سے مکمل اظہار یکجہتی

قطر نے سعودی عرب کے ساتھ اپنی مکمل یکجہتی کا اظہار کرتے ہوئے کہا ہے کہ وہ مملکت کی سلامتی اور ارضی سالمیت کے تحفظ کے لیے کیے گئے تمام اقدامات کی حمایت کرتی ہے۔

قطر کی وزارت خارجہ نے مزید کہا کہ خطے میں کشیدگی میں کمی اور بحران کے سفارتی حل کے طریقے اقوام متحدہ کی جنرل اسمبلی کے 81 ویں اجلاس میں قطری وفد کے ایجنڈے میں سرفہرست ہوں گے۔

وزارت خارجہ کے مطابق قطر اپنے علاقائی اور بین الاقوامی شراکت داروں کے ساتھ مسلسل کام کر رہا ہے، سفارت کاری اور مکالمے کو فروغ دے رہا ہے اور کشیدگی میں کمی کی کوششوں کی حمایت کر رہا ہے، تاکہ بحران کا پرامن حل تلاش کیا جا سکے۔ قطر نے اس بات پر زور دیا کہ حتمی حل صرف مذاکرات کے ذریعے ہی ممکن ہے۔

مزید کہا گیا کہ قطر اور پوری دنیا کے لیے بحری جہازرانی اور تجارت کی آزادی انتہائی اہمیت رکھتی ہے۔ قطر نے واضح کیا کہ بین الاقوامی آبی گذرگاہوں کی بندش ناقابل قبول ہے اور اس نے عالمی برادری پر زور دیا کہ وہ بحری جہازرانی کی آزادی کے تحفظ کے لیے مشترکہ کوششیں کرے، خاص طور پر آبنائے ہرمز کی بندش اور باب المندب میں کشیدگی کے تناظر میں۔