سعودی دفاعی مہارت اور تعلیمی شعبے میں تعاون چاہتے ہیں، وزیر خارجہ شام

شامی وزیر خارجہ اسعد الشیبانی نے کہا ہے کہ ان کا ملک دفاعی صنعت اور تعلیمی شعبے میں سعودی عرب کی مہارت سے استفادہ کرنا چاہتا ہے۔ انہوں نے سعودی عرب کے ساتھ فوجی تعاون کی اہمیت پر زور دیتے ہوئے کہا کہ شام کو اس شعبے میں سب سے زیادہ ضرورت ہے۔

الشيبانی نے یہ بات دمشق کے قصر تشرين میں اپنے اردنی ہم منصب ایمن الصفدی سے ملاقات کے دوران کہی۔ انہوں نے کہا کہ شام اور اردن کے تعلقات مضبوط ہیں اور اردن کا امن شام کے امن سے جڑا ہوا ہے۔ ان کا کہنا تھا کہ دونوں ملکوں کے درمیان اسٹریٹجک شراکت داری کسی بھی رکاوٹ سے بڑی ہے۔

درعا کی حالیہ صورتحال کے حوالے سے شامی وزیر خارجہ نے کہا کہ یہ واقعہ اردن کے ساتھ تعلقات کا امتحان تھا۔ انہوں نے عمان کی جانب سے اس معاملے کو جلد حل کرنے کی کوششوں کو سراہا اور کہا کہ تحقیقات کے نتائج پر عمل درآمد کیا جائے گا۔

انہوں نے مزید کہا کہ شام اردن کے ساتھ سرحدی تجارت کو فروغ دینے اور اسمگلنگ نیٹ ورکس کے خلاف مشترکہ کارروائی کے لیے تعاون کر رہا ہے، جس سے دونوں ملکوں کے درمیان سیکیورٹی اور اقتصادی تعاون مضبوط ہوگا۔

یمنی صورتحال پر بات کرتے ہوئے الشیبانی نے امید ظاہر کی کہ یمن کے عوام کی مشکلات جلد ختم ہوں گی اور ملک میں استحکام واپس آئے گا۔ انہوں نے کہا کہ شام، یمن کی قانونی حکومت کے ساتھ ہے اور حوثی حملوں کے خلاف اس کی حمایت جاری رکھے گا۔

الشيبانی نے اس تاثر کی تردید کی کہ شام نے یمن کی قانونی حکومت کے ساتھ اپنی فوجیں بھیجنے کا کوئی معاہدہ کیا ہے۔ ان کا کہنا تھا کہ اگر دمشق نے شام سے باہر فوجی تعیناتی کا کوئی فیصلہ کیا تو وہ خفیہ نہیں ہوگا۔