جنوبی علاقوں میں موسلا دھار بارش اور سیلاب کا امکان

قومی مرکز برائے موسمیات نے اپنی موسمی رپورٹ میں کہا ہے کہ جازان، عسیر اور باحہ کے بعض علاقوں میں گرج چمک کے ساتھ درمیانے سے شدید درجے کی بارشیں متوقع ہیں، جو سیلابی ریلوں کا باعث بن سکتی ہیں اور بعض مقامات پر ژالہ باری بھی ہو سکتی ہے۔

رپورٹ کے مطابق مکہ مکرمہ، مدینہ منورہ اور نجران کے کچھ حصوں میں ہلکی سے درمیانے درجے کی بارش کا امکان ہے، جبکہ ان علاقوں کے علاوہ تبوک، الجوف اور شمالی سرحدی علاقوں میں بھی گرد آلود ہوائیں چلنے کی توقع ہے۔

مرکز نے مزید بتایا کہ مکہ مکرمہ کے ساحلی علاقوں اور مشرقی ریجن میں رات اور صبح کے اوقات میں دھند چھانے کا بھی امکان ہے۔

ہواؤں کی رفتار اور سمندر کی کیفیت

رپورٹ میں کہا گیا ہے کہ بحیرہ احمر میں سطحی ہوائیں شمال مغرب سے شمال کی سمت 14 سے 40 کلومیٹر فی گھنٹہ، شمال مغرب سے مغرب کی سمت 14 سے 42 کلومیٹر فی گھنٹہ اور جنوب مشرق سے جنوب مغرب کی سمت 10 سے 32 کلومیٹر فی گھنٹہ کی رفتار سے چلیں گی، جبکہ گرج چمک کے ساتھ بارش کے دوران ہواؤں کی رفتار 50 کلومیٹر فی گھنٹہ سے تجاوز کر سکتی ہے۔

بحیرہ احمر میں موجوں کی اونچائی نصف میٹر سے ڈیڑھ میٹر تک رہے گی اور گرج چمک کے ساتھ بارش کے دوران یہ دو میٹر سے بھی زیادہ ہو سکتی ہے۔ عام حالات میں سمندر ہلکے سے درمیانے درجے کی موجوں والا رہے گا، تاہم بارش کے دوران موجیں تیز ہو جائیں گی۔

خلیج عرب میں سطحی ہوائیں شمال مغرب سے مغرب کی سمت شام کے وقت جنوب کی طرف 12 سے 30 کلومیٹر فی گھنٹہ اور مغرب سے جنوب مغرب کی سمت 10 سے 25 کلومیٹر فی گھنٹہ کی رفتار سے چلیں گی۔ یہاں موجوں کی اونچائی نصف میٹر سے ایک میٹر تک رہے گی اور سمندر ہلکی موجوں والا رہے گا۔