ربع الخالی کسٹم نے 4.5 کلو گرام شبو اسمگلنگ ناکام بنا دی

زکوٰة، ٹیکس و کسٹمز اتھارٹی (زاتکا) نے ربع الخالی بارڈر پر 4.559 کلو گرام میتھ ایمفیٹامین (شبو) کی اسمگلنگ کی کوشش ناکام بنا دی، جو ایک ٹرک میں چھپائی گئی تھی اور مملکت میں داخل ہو رہی تھی۔

زاتکا کے ترجمان حمود الحربی نے بتایا کہ جب ایک ٹرک کو کسٹم کارروائی اور سکیورٹی ٹیکنالوجی کے ذریعے چیک کیا گیا تو شبو کی یہ مقدار ٹرک کی مشین میں چھپائی ہوئی ملی۔

انہوں نے مزید بتایا کہ ضبطی کے بعد جنرل ڈائریکٹوریٹ آف نارکوٹکس کنٹرول کے ساتھ رابطہ کیا گیا اور مملکت کے اندر وصول کنندہ کو گرفتار کر لیا گیا۔

ترجمان نے اس عزم کا اعادہ کیا کہ اتھارٹی تمام کسٹم پوائنٹس پر مملکت کی درآمدات و برآمدات پر سخت نگرانی جاری رکھے ہوئے ہے اور اسمگلروں کی ہر کوشش کو ناکام بنانے کے لیے وزارت داخلہ اور نارکوٹکس کنٹرول کے ساتھ مل کر کام کر رہی ہے، تاکہ معاشرے کے تحفظ اور ممنوعہ اشیا کی اسمگلنگ کی روک تھام کو یقینی بنایا جا سکے۔

الحربی نے عوام سے اپیل کی کہ وہ اسمگلنگ کے خلاف جدوجہد میں اپنا کردار ادا کریں اور کسی بھی مشتبہ سرگرمی کی اطلاع اتھارٹی کے سکیورٹی ہیلپ لائن (1910)، ای میل ([email protected]) یا بین الاقوامی نمبر (009661910) پر دیں۔ اتھارٹی ان اطلاعات کو مکمل رازداری کے ساتھ وصول کرتی ہے اور درست اطلاع دینے والے کو مالی انعام بھی دیا جاتا ہے۔