ینبع اور جازان سے خطرہ ٹل گیا، شہریوں کو ہدایت جاری

سعودی محکمہ سول ڈیفنس نے آج صبح اعلان کیا ہے کہ ینبع اور جازان میں خطرہ ٹل گیا ہے۔ اس سے قبل ان دونوں علاقوں میں ہنگامی حالات کے لیے قومی پلیٹ فارم کے ذریعے ابتدائی وارننگ جاری کی گئی تھی، جس میں ممکنہ خطرے سے خبردار کیا گیا تھا۔

محکمہ نے شہریوں اور مقیمین پر زور دیا ہے کہ وہ متعلقہ اداروں کی جانب سے جاری کردہ سرکاری ہدایات پر عمل کریں اور تازہ ترین صورتحال کے دوران افواہیں یا غیر مصدقہ ویڈیوز شیئر کرنے سے گریز کریں۔

تحذیر کے دوران حفاظتی ہدایات

سول ڈیفنس نے تاکید کی ہے کہ شہری پرسکون رہیں اور فوری طور پر قریبی محفوظ جگہ یا عمارت کے اندرونی کمروں میں چلے جائیں، کھڑکیوں سے دور رہیں اور خطرہ ختم ہونے تک وہیں قیام کریں۔

محکمہ نے مزید کہا کہ وارننگ کے دوران کھلی جگہوں پر جانے سے گریز کریں، شیشے، بالکونیوں اور چھتوں سے دور رہیں، جبکہ باہر موجود افراد کو ہدایت کی گئی ہے کہ وہ قریبی عمارت یا مضبوط دیوار کے پیچھے پناہ لیں۔

اسی تناظر میں، محکمہ نے یہ بھی کہا ہے کہ عوام غیر ضروری ہجوم یا فوٹوگرافی سے گریز کریں اور اپنی اور دوسروں کی سلامتی کے لیے خطرناک مقامات سے دور رہیں۔