سعودی عرب کے کئی علاقوں میں موسلا دھار بارش اور سیلاب کا خدشہ

قومی مرکز برائے موسمیات نے توقع ظاہر کی ہے کہ آج ہفتہ کے روز جازان، عسیر، الباحہ اور مکہ مکرمہ کے بعض حصوں میں درمیانے سے شدید درجے کی گرج چمک کے ساتھ بارشیں جاری رہیں گی، جس سے سیلابی صورتحال پیدا ہو سکتی ہے۔ اس دوران ژالہ باری اور گرد آلود تیز ہوائیں بھی چلنے کا امکان ہے۔

رپورٹ کے مطابق مدینہ منورہ اور نجران کے بعض حصوں میں ہلکی سے درمیانے درجے کی بارش متوقع ہے۔ اسی طرح مکہ مکرمہ، مدینہ منورہ اور مشرقی ریجن کے ساحلی علاقوں میں رات اور صبح کے اوقات میں دھند چھانے کا بھی امکان ہے۔

ہوا اور سمندر کی صورتحال

مرکز نے بتایا کہ بحیرہ احمر میں سطحی ہوائیں شمال مغرب سے شمال کی سمت 20 تا 42 کلومیٹر فی گھنٹہ کی رفتار سے چلیں گی، جو دوپہر کے بعد مغرب اور شمال مغرب کی سمت 12 تا 42 کلومیٹر فی گھنٹہ ہو جائیں گی۔ جبکہ گرج چمک کے ساتھ بارش کے دوران جنوب مشرق سے جنوب مغرب کی سمت ہوائیں 10 تا 32 کلومیٹر فی گھنٹہ کی رفتار سے چل سکتی ہیں، جو 50 کلومیٹر فی گھنٹہ سے بھی تجاوز کر سکتی ہیں۔

بحیرہ احمر میں موجوں کی اونچائی نصف میٹر سے ڈیڑھ میٹر تک رہے گی اور گرج چمک کے وقت یہ دو میٹر سے بھی زیادہ ہو سکتی ہے۔ اس دوران سمندر کی کیفیت ہلکی سے درمیانی اور بعض اوقات شدید موجوں والی ہو سکتی ہے۔

خلیج عرب میں سطحی ہوائیں جنوب مشرق سے جنوب مغرب کی سمت 10 تا 25 کلومیٹر فی گھنٹہ اور شمال سے شمال مشرق کی سمت 8 تا 25 کلومیٹر فی گھنٹہ کی رفتار سے چلیں گی۔ یہاں موجوں کی اونچائی نصف میٹر سے ایک میٹر تک رہے گی اور سمندر کی کیفیت ہلکی موجوں والی ہو گی۔