سعودی عرب میں آج گرج چمک کے ساتھ بارش اور تیز ہوائیں متوقع

محکمہ موسمیات نے اپنی آج منگل کی رپورٹ میں بتایا ہے کہ جازان، عسیر، الباحہ اور مکہ مکرمہ کے جنوبی حصوں سمیت حائل، الجوف، شمالی حدود، اور قصیم و مشرقی ریجن کے شمالی حصوں میں گرج چمک کے ساتھ بارش، ژالہ باری اور گرد آلود تیز ہوائیں چلنے کا امکان ہے۔ ان علاقوں کے بعض حصوں میں دھند بھی چھا سکتی ہے۔

رپورٹ کے مطابق بحیرہ احمر میں سطحی ہوائیں شمال مغرب سے شمال کی جانب 15 سے 35 کلومیٹر فی گھنٹہ کی رفتار سے چلیں گی، جبکہ شمالی حصے میں یہ رفتار 45 کلومیٹر فی گھنٹہ تک پہنچ سکتی ہے۔ درمیانی حصے میں ہوائیں شمال سے شمال مغرب کی سمت 12 سے 32 کلومیٹر فی گھنٹہ اور جنوبی حصے میں شام کے وقت جنوب مشرق سے شمال مشرق کی سمت 12 سے 32 کلومیٹر فی گھنٹہ رہیں گی۔ سمندر میں لہریں آدھے میٹر سے ڈیڑھ میٹر تک بلند ہوں گی اور بعض اوقات دو میٹر تک پہنچ سکتی ہیں۔ مجموعی طور پر سمندر کی حالت ہلکی سے درمیانی اور بعض مقامات پر شدید ہو سکتی ہے۔

خلیج عرب میں ہوائیں شمال مشرق سے شمال کی سمت 10 سے 30 کلومیٹر فی گھنٹہ کی رفتار سے شمالی حصے میں جبکہ جنوبی حصے میں شمال مغرب سے جنوب مغرب کی سمت 10 سے 30 کلومیٹر فی گھنٹہ چلیں گی۔ یہاں بھی گرج چمک کے ساتھ بارش کے بادل بننے کا امکان ہے۔ شمالی اور جنوبی حصوں میں لہریں آدھے میٹر سے ڈیڑھ میٹر تک اور بعض اوقات دو میٹر سے زیادہ بلند ہو سکتی ہیں۔ سمندر کی کیفیت ہلکی سے شدید ہو سکتی ہے۔