فیفا کے نئے منصوبے پر اختلافات، ایشیائی فیڈریشن نے یویفا اور کونکاکاف کی حمایت کردی

ایشین فٹبال فیڈریشن نے فیفا کی جانب سے 'فیفا فارورڈ انٹرپرائز' کمپنی کے قیام کی تجویز پر تشویش کا اظہار کیا ہے اور یورپی فٹبال فیڈریشن (یویفا) اور شمالی، وسطی امریکی و کیریبین فیڈریشن (کونکاکاف) کے ساتھ اس منصوبے سے متعلق خدشات میں یکجہتی ظاہر کی ہے۔

ایشین فیڈریشن نے اپنے سرکاری بیان میں کہا کہ اس تجویز میں بڑی ٹورنامنٹس میں نجی سرمایہ کاری کی شمولیت سے عالمی فٹبال کمیونٹی میں بے یقینی کی کیفیت پیدا ہوئی ہے۔ بیان میں کہا گیا کہ تشویش صرف منصوبے کی نوعیت تک محدود نہیں بلکہ فیفا کے اندر فیصلہ سازی کے طریقہ کار پر بھی ہے۔

بیان میں مزید کہا گیا کہ اختلافات اس حد تک پہنچ چکے ہیں کہ اب ورلڈ کپ کے بائیکاٹ کا امکان بھی کھلے عام زیر بحث ہے، جو کھیل کے مستقبل سے وابستہ تمام فریقین کے لیے باعث تشویش ہونا چاہیے۔ ایشین فیڈریشن نے واضح کیا کہ عالمی ٹورنامنٹ کی اصل طاقت تمام براعظمی فیڈریشنز اور نمایاں ٹیموں کی شرکت سے ہے۔

ایشین فیڈریشن نے زور دیا کہ ورلڈ کپ کی وحدت اور عالمی حیثیت پر اثر انداز ہونے والا کوئی بھی قدم دوبارہ غور کا متقاضی ہے۔ بیان میں کہا گیا کہ موجودہ بحران نے فیفا کے مشاورتی اور حکومتی نظام میں بنیادی کمزوریاں اجاگر کر دی ہیں۔

بیان میں مزید کہا گیا کہ فیفا کی جانب سے حالیہ وضاحتیں حکمرانی، ادارہ جاتی طریقہ کار اور متعلقہ فریقین سے حقیقی مشاورت سے متعلق بنیادی خدشات دور کرنے میں ناکام رہی ہیں۔

ایشین فیڈریشن نے کہا کہ اس نوعیت کے کسی بھی بڑے منصوبے کو، جو عالمی فٹبال کے تجارتی، اسپورٹس اور اسٹریٹجک مستقبل پر اثرانداز ہو سکتا ہے، اس انداز میں پیش نہیں کیا جانا چاہیے جس سے براعظمی اور قومی فیڈریشنز اور حکومتی ادارے خود کو نظرانداز محسوس کریں۔

ایشین فیڈریشن نے فیفا سے مطالبہ کیا کہ وہ حکمرانی کے نظام اور فیصلہ سازی کے طریقہ کار کا فوری جائزہ لے، تاکہ عالمی اہمیت کے حامل اقدامات حقیقی مشاورت اور متعلقہ قانونی اداروں کی مناسب نگرانی کے ساتھ کیے جائیں۔

بیان کے اختتام پر کہا گیا کہ ورلڈ کپ اور فٹبال پوری عالمی فٹبال فیملی کی مشترکہ ملکیت ہیں اور کھیل کے مستقبل کا تعین اجتماعی طور پر ہونا چاہیے۔