محمد صلاح کی الاتحاد سے معاہدے کی اطلاعات، سالانہ 25 ملین ڈالر کی پیشکش

ترک میڈیا رپورٹس کے مطابق سعودی کلب الاتحاد نے مصر کے معروف فٹبالر اور لیورپول کے سابق اسٹار محمد صلاح کے ساتھ معاہدے کے لیے پیش رفت کی ہے۔ یہ مذاکرات موجودہ سمر ٹرانسفر ونڈو کے دوران اس وقت تیز ہوئے جب محمد صلاح کی ترک کلب بشکتاش سے بات چیت تعطل کا شکار ہوگئی۔

ترک اخبار 'صباح' کے مطابق محمد صلاح نے سعودی روشن لیگ میں الاتحاد کی نمائندگی کے لیے اصولی طور پر رضامندی ظاہر کردی ہے۔ اخبار نے بتایا کہ بشکتاش کے ساتھ معاہدے کی شرائط پر اختلافات کے بعد الاتحاد نے صلاح سے باضابطہ مذاکرات شروع کیے۔

رپورٹس کے مطابق الاتحاد نے محمد صلاح کو سالانہ 25 ملین ڈالر (تقریباً 93.7 ملین سعودی ریال) کی پیشکش کی ہے، جو ترک کلب کے آفر سے کہیں زیادہ ہے۔ ذرائع کے مطابق محمد صلاح نے اس پیشکش کو قبول کرلیا ہے اور توقع ہے کہ جلد معاہدے پر دستخط ہوجائیں گے۔

محمد صلاح کا نام روشن لیگ کے کئی کلبوں سے جوڑا گیا ہے، جن میں الاتحاد، الهلال، النصر، الاهلی، القادسیہ اور الدرعیہ شامل ہیں۔ وہ حال ہی میں لیورپول سے رخصت ہوئے ہیں جہاں انہوں نے نو سال گزارے۔

اسی حوالے سے ترک ویب سائٹ 'ajansspor' نے بھی بتایا کہ الاتحاد نے محمد صلاح کو سالانہ 25 ملین ڈالر کی پرکشش مالی پیشکش کی ہے اور کھلاڑی نے ابتدائی طور پر اس پر آمادگی ظاہر کی ہے، جس سے معاہدہ حتمی مرحلے میں داخل ہوگیا ہے۔

رپورٹ میں مزید کہا گیا ہے کہ بشکتاش کے ساتھ مذاکرات اس وقت رک گئے جب محمد صلاح کے ایجنٹ رامی عباس کی مالی شرائط پر اختلافات سامنے آئے، حالانکہ مذاکرات کافی آگے بڑھ چکے تھے۔

ترک اخبار 'حریت' نے اس سے قبل بتایا تھا کہ محمد صلاح نے اپنے ایجنٹ کے ساتھ مختلف کلبوں کی پیشکشوں پر غور کے لیے ملاقات کی تھی۔ اخبار کے مطابق بشکتاش نے انہیں سالانہ 15 ملین یورو کی پیشکش کی تھی، تاہم مذاکرات ناکام ہوگئے۔

محمد صلاح نے لیورپول کے ساتھ اپنے کیریئر میں شاندار کامیابیاں حاصل کیں، جن میں دو بار پریمیئر لیگ، ایک بار چیمپئنز لیگ، کلب ورلڈ کپ اور یورپی سپر کپ کے ٹائٹل شامل ہیں۔