ریال میڈرڈ کا صدر لا لیگا کی برطرفی کا مطالبہ

ریال میڈرڈ نے ہسپانوی فٹبال لیگ کے صدر خاویر تیباس مدرانو کے حالیہ بیانات پر ردعمل دیتے ہوئے ان پر الزام عائد کیا ہے کہ وہ اپنے عہدے کا استعمال کرتے ہوئے بار بار کلب پر تنقید کر رہے ہیں۔ کلب نے مطالبہ کیا ہے کہ لیگ کی قیادت کسی ایسے شخص کو سونپی جائے جو غیر جانبدار ہو اور اپنے اختیارات کی حدود کو سمجھے۔

ریال میڈرڈ نے اپنے بیان میں کہا: "ہمارے نزدیک یہ ناقابل قبول ہے کہ لا لیگا کے صدر اپنے عہدے کا استعمال کرتے ہوئے مسلسل ریال میڈرڈ پر تنقید اور حملے کریں۔ یہ انتہائی تشویش ناک ہے کہ وہ شخص جو تمام کلبوں کے مفادات کا محافظ ہے، وہ بار بار ریال میڈرڈ کو نشانہ بناتا ہے، جس سے ہمارا کلب ان کے مسلسل حملوں کا ہدف بن چکا ہے۔"

کلب نے مزید کہا کہ تیباس کا حالیہ بیان ایک آزاد صحافی کے مضمون سے متعلق تھا، لیکن صدر لا لیگا نے اس موقع کو ریال میڈرڈ کی اسپورٹس پالیسی پر تنقید کے لیے استعمال کیا۔ بیان میں کہا گیا: "ان کا حالیہ بیان نہایت خطرناک اور ناقابل فہم ہے، جو کسی ذمہ دار عہدے دار کو زیب نہیں دیتا۔ وہ ایک آزاد صحافی کے مضمون پر بات کر رہے تھے، لیکن اس کے باوجود انہوں نے ہمارے کلب پر حملہ کیا اور ہماری اسپورٹس حکمت عملی پر تبصرہ کیا، جو بالکل ناقابل قبول اور غیر ذمہ دارانہ ہے۔"

ریال میڈرڈ نے یہ بھی کہا کہ تیباس اپنے عہدے کی ذمہ داریوں پر توجہ دینے کے بجائے ذاتی پلیٹ فارمز اور وقت کو کلب پر تنقید کے لیے استعمال کرتے ہیں۔ بیان میں کہا گیا: "یہ حیران کن ہے کہ لا لیگا کے صدر اپنا وقت اور ذاتی چینلز ریال میڈرڈ کی ساکھ کو نقصان پہنچانے میں صرف کرتے ہیں، بجائے اس کے کہ وہ اپنے عہدے کی ذمہ داریوں کے تحت اداروں پر اعتماد کو فروغ دیں، جو مقابلے کی شفافیت کی ضمانت دیتے ہیں۔"

کلب نے مزید کہا کہ اس رویے سے ہسپانوی فٹبال اور مقابلوں کی عالمی ساکھ کو نقصان پہنچ رہا ہے۔ بیان میں کہا گیا: "اس طرح وہ ہماری مقابلوں اور ہسپانوی فٹبال کی عالمی ساکھ کو مسلسل نقصان پہنچا رہے ہیں۔"

بیان کے آخر میں ریال میڈرڈ نے ہسپانوی پروفیشنل فٹبال کی قیادت میں تبدیلی کا مطالبہ کرتے ہوئے کہا: "اس نامناسب اور مسلسل رویے کے پیش نظر، ہمارا ماننا ہے کہ ہسپانوی پروفیشنل فٹبال کو فوری طور پر ایسے رہنما کی ضرورت ہے جو غیر جانبداری کے ساتھ اس کی مکمل صلاحیتوں کو اجاگر کر سکے۔"

کلب نے صدر لا لیگا کے عہدے کی نوعیت پر زور دیتے ہوئے کہا: "ہمیں ایسے شخص کی ضرورت ہے جو اپنے عہدے کی نوعیت کو سمجھے، کیونکہ لا لیگا کا صدر مقابلے کا مالک نہیں بلکہ ان کلبوں کا منتظم ہے جو اس پر اعتماد کرتے ہیں۔ ہم کلبوں کو ایک ایسے شخص کی ضرورت ہے جو اس ذمہ داری کو دیانت داری سے نبھائے۔"

یاد رہے کہ تیباس نے سوشل میڈیا پر اپنے پیغام میں ریفری کے حوالے سے کی جانے والی تنقید پر ردعمل ظاہر کرتے ہوئے وہی جملے دہرائے جو وہ اکثر ریال میڈرڈ پر تنقید کے لیے استعمال کرتے ہیں۔ انہوں نے ریال میڈرڈ ٹی وی کو "نظام کا ٹی وی" قرار دیا اور کہا: "جب نیگرئیرا نہیں ہوتا تو ریفری ہوتا ہے۔ بس بہت ہو گیا! اب یہ بہانہ کوئی عقلمند شخص نہیں مانتا۔"