اسپین کے آگوسٹین بو باریونوئیوو سعودی یوتھ ہینڈ بال ٹیم کے ہیڈ کوچ مقرر

سعودی ہینڈ بال فیڈریشن نے نوجوانوں کی قومی ٹیم کی فنی ذمہ داری اسپین کے کوچ آگوسٹین بو باریونوئیوو کے سپرد کی ہے۔ اس اقدام کا مقصد عالمی تجربات سے فائدہ اٹھا کر کم عمر کھلاڑیوں کی تربیت اور ایک نئی نسل تیار کرنا ہے۔
بو باریونوئیوو کھلاڑیوں کی صلاحیتیں نکھارنے اور ٹیلنٹ ڈویلپمنٹ کے ماہر کوچ مانے جاتے ہیں۔ ان کا تربیتی انداز جدید تجزیاتی طریقوں اور جدید ترین تربیتی اسلوب پر مبنی ہے، جس سے کھلاڑیوں کی فنی اور جسمانی سطح بہتر ہوتی ہے۔
اسپین کے اس کوچ کے پاس یورپی ہینڈ بال فیڈریشن کی جانب سے جاری کردہ (EHF Master Handball Coach) سرٹیفکیٹ ہے، جو کھیل کے شعبے میں اعلیٰ ترین تربیتی اسناد میں شمار ہوتا ہے اور صرف ان کوچز کو دیا جاتا ہے جو جدید تربیتی پروگراموں اور کھلاڑیوں کی ترقی کے منصوبوں کی قیادت کے اہل ہوں۔
بو باریونوئیوو کو مختلف ممالک میں کوچنگ کا وسیع تجربہ حاصل ہے۔ وہ اسپین، ناروے اور شمالی مقدونیا کے کلبوں کے علاوہ ارجنٹائن کی قومی ٹیم کے فنی عملے کے ساتھ بھی کام کر چکے ہیں۔ اس کے علاوہ وہ ناروے ہینڈ بال فیڈریشن کے پلیئر ڈویلپمنٹ پروگرامز میں بھی شامل رہے ہیں۔
اپنے کیریئر کے دوران انہوں نے کئی نمایاں کامیابیاں حاصل کیں، جن میں 2024 میں ناروے کے کولستاد کلب کے ساتھ لیرائے نیشنل چیمپیئن شپ جیتنا، شمالی علاقے کی ٹیم کے ساتھ بائیلاگسٹورنیرنگ ٹورنامنٹ اور مقدونیا کے واردار اسکوپیہ کلب کے ساتھ مقدونیا کپ جیتنا شامل ہے۔
اب وہ سعودی عرب میں ٹیلنٹ ڈسکوری پراجیکٹ کے فنی نگران بھی ہوں گے، جس کا پہلا مرحلہ مشرقی ریجن سے شروع ہو رہا ہے۔ اس کا مقصد 2010 اور 2011 میں پیدا ہونے والے نوجوان کھلاڑیوں کی تلاش اور تربیت ہے۔
مشرقی ریجن کا کیمپ آٹھ اگست سے شروع ہو گا اور اکیس اگست تک چودہ روز جاری رہے گا، جس میں 56 کھلاڑی حصہ لیں گے۔ یہ کیمپ پرنس نائف بن عبدالعزیز اسپورٹس سٹی، قطیف میں منعقد ہو گا۔
یہ پروگرام سعودی ہینڈ بال فیڈریشن کی اس حکمت عملی کا حصہ ہے جس کے تحت کم عمر کھلاڑیوں کی تلاش اور تربیت کے عمل کو وسعت دی جا رہی ہے، تاکہ مستقبل میں قومی ٹیموں کے لیے مضبوط بنیاد فراہم کی جا سکے۔