سعودی عرب میں ایشین کپ 2027 کے شیڈول اور مقامات کا اعلان

ایشین فٹبال کنفیڈریشن اور سعودی عرب میں ایشین کپ 2027 کی مقامی آرگنائزنگ کمیٹی نے اعلان کیا ہے کہ ٹورنامنٹ کے میچز کا مکمل شیڈول اور تمام مقابلوں کے اوقات و مقامات کی تصدیق کر دی گئی ہے۔ یہ تیاری اس بڑے ایونٹ کے آغاز کے لیے کی گئی ہے جو مملکت میں 7 جنوری سے 5 فروری 2027 تک منعقد ہوگا۔

سعودی عرب پہلی بار ایشین کپ کے فائنلز کی میزبانی کرے گا۔ ٹورنامنٹ کی انیسویں ایڈیشن میں 24 ٹیمیں حصہ لیں گی، جو 51 میچز میں آٹھ اسٹیڈیمز پر مدمقابل ہوں گی۔ یہ اسٹیڈیمز ریاض، جدہ اور الخبر میں واقع ہیں۔

ٹورنامنٹ کا آغاز جمعرات 7 جنوری 2027 کو ہوگا، جس میں افتتاحی میچ سعودی عرب اور فلسطین کے درمیان شام 8 بجے کنگ فہد اسپورٹس سٹیڈیم ریاض میں کھیلا جائے گا، جس کی گنجائش تقریباً 72,000 تماشائیوں کی ہے۔

گروپ اسٹیج کے مقابلے 20 جنوری تک جاری رہیں گے، جبکہ راؤنڈ آف 16 کا آغاز 22 جنوری سے ہوگا۔ کوارٹر فائنل میچز 28 اور 29 جنوری کو ہوں گے، سیمی فائنل یکم اور 2 فروری کو جبکہ فائنل 5 فروری کو شام 8 بجے کنگ فہد اسپورٹس سٹیڈیم ریاض میں کھیلا جائے گا۔

منتظمین کے مطابق، حتمی شیڈول کی تیاری، میچز کی تقسیم اور اوقات کار میں انتظامی، تجارتی اور نشریاتی تقاضوں کے ساتھ ساتھ مقامی انتظامات کو بھی مدنظر رکھا گیا ہے تاکہ شائقین کے لیے بہترین تجربہ فراہم کیا جا سکے۔

ٹورنامنٹ کے 51 میچز آٹھ اسٹیڈیمز میں ہوں گے: ریاض میں پانچ، جدہ میں دو اور الخبر میں ایک اسٹیڈیم۔ تمام میچز کے اوقات سعودی عرب کے مقامی وقت کے مطابق طے کیے گئے ہیں۔