گھریلو ملازمین کو اختتامی خدمت کی ادائیگی کب ملے گی؟ مساند کی وضاحت

سعودی عرب میں گھریلو ملازمین کی خدمات کے لیے قائم پلیٹ فارم 'مساند' نے واضح کیا ہے کہ گھریلو ملازم کو اختتامی خدمت کی ادائیگی اس وقت ملتی ہے جب وہ اپنے آجر کے ہاں چار سال مسلسل کام مکمل کرے۔

پلیٹ فارم نے اپنے سرکاری ایکس اکاؤنٹ پر بتایا کہ یہ ادائیگی ایک ماہ کی تنخواہ کے برابر ہوتی ہے اور اس کا حساب ملازم کی آخری تنخواہ کی بنیاد پر کیا جاتا ہے۔ یہ رقم ملازم کو اس وقت دی جاتی ہے جب اس کا معاہدہ ختم ہو جائے۔

مساند نے دونوں فریقین کے حقوق کے تحفظ پر زور دیتے ہوئے کہا کہ معاہدہ ختم ہونے پر گھریلو ملازم کے واجبات کی ادائیگی یقینی بنائی جائے۔

ایکس پر اصل پوسٹ دیکھیں

گھریلو ملازمین کی بھرتی

مساند کے سرکاری اکاؤنٹ نے یہ بھی واضح کیا ہے کہ گھریلو ملازمین کی بھرتی کے لیے سرکاری ذرائع سے رجوع کرنا ضروری ہے، اور تمام ادائیگیاں پلیٹ فارم کے ذریعے کرنا سب سے محفوظ طریقہ ہے تاکہ شفافیت برقرار رہے اور فراڈ سے بچا جا سکے۔

مساند نے اپنے ایکس اکاؤنٹ پر بتایا کہ مالی اور قانونی حقوق کے تحفظ کے لیے تین بنیادی اقدامات ضروری ہیں:

مساند پلیٹ فارم کے ذریعے ادائیگی: تمام مالی واجبات سرکاری چینلز کے ذریعے الیکٹرانک طور پر ادا کی جائیں تاکہ مالی لین دین کا ریکارڈ رہے اور صارفین محفوظ رہیں۔

استقدام دفتر کی تصدیق: معاہدہ شروع کرنے سے پہلے اس بات کی تصدیق کریں کہ استقدام کا دفتر مساند پلیٹ فارم پر رجسٹرڈ اور لائسنس یافتہ ہے۔

معاہدوں کا جائزہ اور منظوری: معاہدے کی شرائط اور متن کو پلیٹ فارم پر چیک کریں اور اسے الیکٹرانک طور پر منظور کریں تاکہ اس کی دستاویزات مکمل ہوں اور تمام فریقین کے حقوق محفوظ رہیں۔