اقوام متحدہ کے سربراہ کی مغربی کنارے میں آبادکاری اور تشدد پر تشویش

اقوام متحدہ کے سیکریٹری جنرل انتونیو گوتریش نے مقبوضہ مغربی کنارے میں اسرائیل کے حالیہ اقدامات، جن میں زرعی آبادکاری کی چوکیوں کو قانونی حیثیت دینے اور نئی چوکیوں کے قیام کی اطلاعات شامل ہیں، پر شدید تشویش ظاہر کی ہے۔ انہوں نے ان اقدامات کے امن اور دو ریاستی حل کے امکانات پر منفی اثرات پر گہری تشویش کا اظہار کیا۔
انہوں نے کہا کہ تمام آبادکاریاں، بشمول آبادکاری کی چوکیاں، کسی بھی قانونی حیثیت سے محروم ہیں اور یہ بین الاقوامی قانون کی کھلی خلاف ورزی ہیں۔ ان کا کہنا تھا کہ یہ اقدامات دو ریاستی حل اور منصفانہ، پائیدار اور جامع امن کے قیام میں بڑی رکاوٹ ہیں۔
اسی تناظر میں، اقوام متحدہ کے دفتر برائے انسانی امور (اوچا) نے حالیہ دنوں میں مغربی کنارے کے مختلف علاقوں میں تشدد میں اضافے پر گہری تشویش ظاہر کی ہے۔
دفتر کے مطابق، جمعرات سے اب تک کم از کم آٹھ فلسطینی، جن میں ایک بچہ بھی شامل ہے، جاں بحق ہو چکے ہیں، جبکہ گھروں، مساجد، درختوں اور زرعی املاک کو آگ لگا دی گئی۔ دفتر نے بتایا کہ حالیہ پرتشدد واقعات کے باعث کم از کم دس فلسطینی خاندان اپنے گھروں سے نقل مکانی پر مجبور ہوئے ہیں۔
اوچا نے اس بات پر زور دیا کہ انسانی شعبے کی تنظیمیں مسلسل شہریوں کے فوری تحفظ، بین الاقوامی انسانی قانون اور انسانی حقوق کے قانون کی مکمل پاسداری اور خلاف ورزیوں کے ذمہ داران کے احتساب کا مطالبہ کر رہی ہیں۔