امارات کی حوثی حملے کی مذمت، سعودی عرب سے مکمل اظہار یکجہتی

متحدہ عرب امارات نے سخت ترین الفاظ میں اس حوثی حملے کی مذمت کی ہے جس میں بحیرہ احمر میں سفر کے دوران سعودی کمپنی کی کشتی (ENCELIA) کو نشانہ بنایا گیا۔

اماراتی وزارت خارجہ نے کہا ہے کہ یہ حملہ بین الاقوامی بحری جہاز رانی کی سلامتی اور تحفظ کے لیے سنگین خطرہ ہے اور یہ دنیا کے اہم بحری راستوں کے امن و استحکام کو سبوتاژ کرنے کی خطرناک کوشش ہے۔

وزارت خارجہ نے عالمی برادری پر زور دیا کہ وہ اقوام متحدہ کی سلامتی کونسل کی متعلقہ قراردادوں، خصوصاً یمن سے متعلق قرارداد نمبر 2216 اور بحیرہ احمر میں جہاز رانی کی آزادی سے متعلق قرارداد نمبر 2722 پر عمل درآمد کو یقینی بنائے۔ وزارت نے اس بات پر زور دیا کہ بین الاقوامی بحری راستوں میں جہاز رانی کی آزادی بین الاقوامی قانون اور 1982 کے اقوام متحدہ کے قانونِ سمندر کے تحت یقینی بنائی گئی ہے۔

وزارت نے اس موقع پر سعودی عرب کے ساتھ امارات کی مکمل یکجہتی اور اس کے امن و استحکام کے تحفظ کے لیے ہر ممکن حمایت کا اعادہ کیا۔