اقوام متحدہ کے سیکریٹری جنرل کا مشرق وسطیٰ میں بے قابو صورتحال پر انتباہ

اقوام متحدہ کے سیکریٹری جنرل انتونیو گوتریس نے خبردار کیا ہے کہ مشرق وسطیٰ میں صورتحال قابو سے باہر ہوتی جا رہی ہے اور خطہ بے قابو ہونے کے قریب ہے۔

گوتریس نے سلامتی کونسل میں بریفنگ دیتے ہوئے کہا کہ موجودہ بحرانوں کا کوئی فوجی حل نہیں اور صرف سفارت کاری ہی پیش رفت اور وسیع تر تصادم سے بچنے کا واحد راستہ ہے۔

سیکریٹری جنرل نے اس بات پر بھی زور دیا کہ جیو پولیٹیکل اختلافات میں اسلحے کی زبان سے گریز کیا جائے اور سلامتی کونسل کے رکن ممالک کو چاہیے کہ وہ اتفاق رائے اور مکالمے کے ذریعے تنازعات کا پرامن حل تلاش کریں۔

گوتریس نے واضح کیا کہ شہری انفراسٹرکچر کو نشانہ بنانا ناقابل قبول ہے اور پورے مشرق وسطیٰ میں لڑائی فوری طور پر روکی جائے۔

انہوں نے بین الاقوامی بحری نقل و حمل کے تمام حقوق اور آزادیوں کی بحالی پر زور دیتے ہوئے کہا کہ آبنائے ہرمز اور باب المندب میں بحری سلامتی عالمی استحکام کے لیے ناگزیر ہے۔