غیر واضح نمبر پلیٹ پر گاڑی چلانا قابل جرمانہ قرار

ٹریفک پولیس نے گاڑیوں کی نمبر پلیٹ واضح رکھنے اور خراب ہونے کی صورت میں انہیں تبدیل کرنے کی اہمیت پر زور دیا ہے۔

ادارہ ٹریفک نے ایکس پلیٹ فارم پر وضاحت کی کہ غیر واضح یا خراب نمبر پلیٹ کے ساتھ گاڑی چلانا ٹریفک خلاف ورزی ہے، جس پر ایک ہزار سے دو ہزار سعودی ریال تک جرمانہ عائد کیا جائے گا۔

ٹریفک پولیس نے شاہراہوں پر گاڑیوں کے درمیان خطرناک انداز میں بار بار لین بدلنے کے عمل سے بھی خبردار کیا ہے اور کہا ہے کہ اس سے ڈرائیور گاڑی پر کنٹرول کھو سکتا ہے۔

ادارے نے ایکس پلیٹ فارم پر مزید بتایا کہ تیز رفتاری سے لین بدلنا بھی ٹریفک خلاف ورزی ہے، جس پر تین ہزار سے چھ ہزار سعودی ریال تک جرمانہ ہو سکتا ہے۔

ٹریفک پولیس نے تمام سڑکوں پر محتاط ڈرائیونگ کی ضرورت پر بھی زور دیا ہے۔

ادارے نے ایکس پلیٹ فارم پر مزید کہا کہ مقررہ رفتار کی پابندی، محفوظ فاصلہ رکھنا اور ترجیحی حقوق دینا ضروری ہے۔

مزید ہدایات میں یہ بھی شامل ہے کہ سمت یا لین بدلتے وقت اشارے کا استعمال کریں، توجہ مرکوز رکھیں، راستے سے غافل نہ ہوں اور اچانک صورتحال میں وارننگ لائٹس کا استعمال کریں۔