برطانیہ کا فلسطینی علاقوں میں شہریوں کے تحفظ پر زور

برطانیہ نے مقبوضہ فلسطینی علاقوں میں بڑھتے ہوئے تشدد، خصوصاً اسرائیلی آبادکاروں کی جانب سے فلسطینی دیہات اور آبادیوں پر حملوں اور ان کے نتیجے میں ہونے والی ہلاکتوں کی شدید مذمت کی ہے۔ ان واقعات میں قصرة اور کور نامی دیہات میں دو مساجد کو بھی نذر آتش کیا گیا۔

برطانوی وزیر برائے امور مشرق وسطیٰ اسٹیفن ڈاؤٹی نے اپنے بیان میں شہریوں کے تحفظ، بین الاقوامی قوانین کے احترام اور تشدد کے مرتکب افراد کے احتساب کی ضرورت پر زور دیا۔ انہوں نے اسرائیلی حکومت سے مطالبہ کیا کہ وہ مقبوضہ فلسطینی علاقوں میں فلسطینیوں کے تحفظ کو یقینی بنائے، آبادکاروں کے تشدد کو روکنے کے لیے مؤثر اقدامات کرے اور ذمہ داروں کو انصاف کے کٹہرے میں لائے۔

برطانیہ نے تشدد کے ردعمل میں غیر قانونی بستیوں اور چوکیوں کی توسیع کی دھمکیوں کی بھی مذمت کی ہے۔ برطانوی حکومت نے واضح کیا کہ یہ بستیاں بین الاقوامی قانون کے تحت غیر قانونی ہیں، دو ریاستی حل کے امکانات کو کمزور کرتی ہیں اور فلسطینیوں و اسرائیلیوں دونوں کے لیے عدم تحفظ میں اضافہ کرتی ہیں۔ برطانیہ نے مذاکرات کے ذریعے دو ریاستی حل کے عزم کا اعادہ کیا، جس سے اسرائیل کی سلامتی کے ساتھ ساتھ ایک خودمختار فلسطینی ریاست کے قیام اور پائیدار امن و سلامتی کو یقینی بنایا جا سکے۔