غزہ میں فلسطینی شہداء کی تعداد 73 ہزار سے تجاوز کر گئی

اسرائیلی حملوں کے نتیجے میں غزہ میں فلسطینی شہداء کی تعداد 73 ہزار 335 ہو گئی ہے، جب کہ زخمیوں کی تعداد ایک لاکھ 74 ہزار 52 تک پہنچ گئی ہے۔ ان میں بچے، خواتین اور مکمل خاندان بھی شامل ہیں۔ دو سال قبل شروع ہونے والے حملے کے بعد اب بھی مختلف علاقوں میں تباہ شدہ گھروں اور عمارتوں کے ملبے تلے سے لاشیں نکالی جا رہی ہیں۔

اسی حوالے سے فلسطینی طبی ذرائع نے بتایا ہے کہ گزشتہ 24 گھنٹوں کے دوران اسرائیلی جنگ بندی معاہدے کی مسلسل خلاف ورزیوں کے نتیجے میں دو مزید شہداء، جن میں ایک زخموں کی تاب نہ لاتے ہوئے جاں بحق ہوا، اور 29 زخمیوں کو غزہ کے اسپتالوں میں منتقل کیا گیا ہے۔ واضح رہے کہ جنگ بندی کا معاہدہ 10 اکتوبر کو نافذ ہوا تھا۔