ابشر سفر: زائرین کے لیے نئی سہولت کی تفصیلات جاری

ابشر پلیٹ فارم نے زائرین کے لیے 'ابشر سفر' سروس کی تفصیلات جاری کی ہیں۔ وزارت داخلہ نے یہ سروس مملکت کے تمام زمینی بارڈر سے آنے والے خلیجی ممالک کے شہریوں اور دیگر زائرین کے لیے ابشر ایپ کے ذریعے متعارف کرائی ہے۔

ابشر سفر سروس کیا ہے؟

ابشر پلیٹ فارم کے مطابق یہ سروس زائرین کو زمینی سرحدوں پر پہنچنے سے پہلے سفر کی تمام ضروریات الیکٹرانک طور پر مکمل کرنے کی سہولت دیتی ہے، جس میں مسافر اور گاڑی کی معلومات کا اندراج اور گاڑی کا بیمہ کرانا شامل ہے، تاکہ سعودی عرب آمد کے عمل کو آسان بنایا جا سکے۔

خلیجی اور غیر خلیجی زائرین جو سعودی عرب زمینی راستے سے آ رہے ہیں، اس سروس سے فائدہ اٹھا سکتے ہیں۔

کیا سروس کے لیے ابشر ایپ میں لاگ ان ضروری ہے؟

نہیں، زائرین ابشر ایپ کے ذریعے اس سروس سے لاگ ان کیے بغیر بھی استفادہ کر سکتے ہیں۔

سروس سے کیسے فائدہ اٹھایا جا سکتا ہے؟

اس سروس سے فائدہ اٹھانے کے لیے ابشر ایپ کھولیں، عمومی خدمات میں سے 'ابشر سفر برائے زائرین' منتخب کریں، شناخت کی قسم اور مطلوبہ معلومات درج کریں، بارڈر اور متوقع سفر کی تاریخ منتخب کریں، ذاتی اور گاڑی کی معلومات پُر کریں اور گاڑی کا بیمہ مکمل کریں۔

یہ سروس اجرا کی تاریخ سے چھ ماہ بعد زائرین کے لیے لازمی ہو جائے گی اور اس سے مسافروں اور گاڑیوں کے داخلے کے عمل کو خودکار اور آسان بنایا جا سکے گا۔ اس کے تحت سفر کی کارروائی اور تمام تقاضے سرحد پر پہنچنے سے پہلے ڈیجیٹل طور پر مکمل کیے جا سکیں گے، جن میں مسافر اور گاڑی کی معلومات کا اندراج اور گاڑی کا بیمہ شامل ہے۔