یونان، فرانس اور اسپین میں جنگلاتی آگ شدت اختیار کر گئی

تیز ہواؤں کے باعث جنگلاتی آگ نے آج یونان کے کئی علاقوں کو اپنی لپیٹ میں لے لیا، جن میں دارالحکومت ایتھنز کے قریب کے علاقے بھی شامل ہیں۔ آگ بجھانے اور لوگوں کے انخلا کے لیے وسیع پیمانے پر آپریشن جاری ہے۔

یونانی حکام نے اٹیکا اور ایویا علاقوں میں آگ کے خطرے میں اضافے کی وارننگ جاری کی ہے۔ بویوتیا کے علاقے میں آگ بجھانے کے لیے 300 سے زائد فائر فائٹرز، 92 گاڑیاں، طیارے اور بھاری مشینری حصہ لے رہی ہے، جبکہ 200 سے زائد افراد کو سمندر کے راستے محفوظ مقام پر منتقل کیا گیا ہے۔

فرانس کے جنوب مشرقی علاقے فار میں بھی جنگلاتی آگ دوبارہ بھڑک اٹھی ہے، جو چھ گھنٹوں میں ایک ہزار ہیکٹر سے زائد رقبے تک پھیل گئی۔ اس کے باعث تقریباً 2500 افراد کو انخلا کرنا پڑا۔ رواں سال کے آغاز سے اب تک ملک بھر میں 119 ہزار ہیکٹر سے زائد رقبہ آگ سے متاثر ہوا ہے۔

اسپین میں بھی فائر بریگیڈز کئی مقامات پر آگ بجھانے میں مصروف ہیں۔ لیون صوبے میں صورتحال مزید خراب ہو گئی ہے، جبکہ ثامورا صوبے میں حالات بہتر ہونے پر 14 دیہات کے رہائشیوں کو واپسی کی اجازت دے دی گئی ہے۔ کاسٹیون صوبے میں آگ پر قابو پا لیا گیا ہے، جہاں تقریباً 10 ہزار ہیکٹر رقبہ متاثر ہوا۔