سعودی عرب واپسی: خروج و عودہ ویزے کے بعد دوبارہ داخلے کی وضاحت

سعودی محکمہ پاسپورٹ نے اُن سابق مقیمین کے بارے میں وضاحت پیش کی ہے جو خروج و عودہ ویزے پر مملکت سے روانہ ہوئے اور واپس نہیں آئے۔ یہ وضاحت ایک شہری کے سوال کے جواب میں دی گئی، جس نے پوچھا تھا کہ روانگی کے دو سال چھ ماہ بعد دوبارہ سعودی عرب میں داخلہ ممکن ہے یا نہیں۔

سوال کرنے والے نے بتایا کہ وہ تقریباً دو سال چھ ماہ قبل خروج و عودہ ویزے پر سعودی عرب سے روانہ ہوئے تھے اور اب امریکہ میں مستقل اقامت رکھتے ہیں۔ انہوں نے دریافت کیا کہ کیا وہ سعودی عرب آ کر ایئرپورٹ پر سیاحتی ویزا حاصل کر سکتے ہیں؟

ایکس پر اصل پوسٹ دیکھیں

محکمہ پاسپورٹ نے اپنے ایکس اکاؤنٹ پر وضاحت کی کہ اگر کسی شخص کا خروج مملکت سے ضابطے کے مطابق ہوا ہو اور اس پر کوئی اعتراض درج نہ ہو، تو وہ نئی ویزا شرائط پوری کر کے دوبارہ سعودی عرب آ سکتا ہے۔

یہ وضاحت محکمہ پاسپورٹ کی جانب سے ان مسافروں اور سابق مقیمین کے سوالات کے جواب میں آئی ہے جو خروج و عودہ ویزے کی مدت ختم ہونے کے بعد دوبارہ سعودی عرب آنے کے ضوابط جاننا چاہتے ہیں۔ محکمہ نے اس بات پر بھی زور دیا کہ نئی ویزا کے تمام تقاضے پورے کرنا ضروری ہے۔