ایران کا ہمسایہ ممالک سے دشمنی نہ رکھنے کا اعلان

ایرانی وزیر خارجہ عباس عراقچی نے کہا ہے کہ ایران مشرق وسطیٰ کے ہمسایہ ممالک کو اپنا دشمن نہیں سمجھتا، اور تہران کی تمام سرگرمیاں صرف امریکہ کے خلاف ہیں۔

عراقچی نے 'العربیہ' سے گفتگو میں واضح کیا کہ ایران تنازع کے خاتمے کے بعد ہمسایہ ممالک سے مکالمہ جاری رکھنے اور ان کے ساتھ اعتماد کی بحالی کے لیے کام کرنے کا ارادہ رکھتا ہے۔

ایرانی وزیر خارجہ نے مزید کہا کہ خطے میں اس بات کا مشترکہ ادراک موجود ہے کہ ایران کے اقدامات ہمسایہ ممالک کے خلاف دشمنی پر مبنی نہیں بلکہ اس کے پیچھے دیگر وجوہات ہیں جن سے تمام فریق آگاہ ہیں۔

عراقچی نے کہا کہ "خطے کے ممالک ہمیشہ ایک دوسرے کے ہمسایہ رہیں گے"۔ ان کا کہنا تھا کہ ان ممالک کو پُرامن اور مستحکم ماحول میں رہنا چاہیے اور یہ غیر منطقی ہے کہ خطے کے ممالک کے تعلقات ہمیشہ کشیدگی اور اختلافات کے اسیر رہیں۔

ایرانی وزیر خارجہ کے یہ بیانات ایسے وقت سامنے آئے ہیں جب ایرانی فوج نے آج خبردار کیا ہے کہ اگر امریکہ نے ایران پر حملے جاری رکھے تو جنگ مزید پھیل سکتی ہے۔ یہ بیان اسرائیلی وزیر اعظم بنیامین نیتن یاہو کے دورہ واشنگٹن سے قبل سامنے آیا ہے۔