کل سے سعودی عرب میں بارشوں کا نقشہ ہفتہ تک

قومی مرکز برائے موسمیات نے پیش گوئی کی ہے کہ سعودی عرب کے وسیع علاقوں میں گرج چمک کے ساتھ بارشوں کا سلسلہ کل منگل سے شروع ہو کر ہفتہ تک جاری رہے گا، جبکہ بارش کی شدت اور موسمی اثرات مختلف علاقوں میں مختلف رہیں گے۔

مرکز نے اپنے سرکاری ایکس اکاؤنٹ پر بتایا کہ اس موسمی صورتحال کے دوران تیز ہوائیں، ژالہ باری، سمندری لہروں میں اضافہ اور سیلابی ریلے بھی متوقع ہیں۔

مرکز کے مطابق جازان، عسیر، باحہ اور مکہ مکرمہ کے علاقوں میں درمیانے سے شدید بارشیں متوقع ہیں، جبکہ منگل اور بدھ کو جازان اور عسیر میں بارش کی شدت زیادہ ہو سکتی ہے۔

اسی طرح تبوک، الجوف اور شمالی حدود کے کچھ حصوں میں ہلکی سے درمیانے درجے کی، جبکہ کہیں کہیں شدید بارشیں ہو سکتی ہیں۔ مدینہ منورہ اور حائل کے بعض علاقوں میں بھی ہلکی سے درمیانے درجے کی بارش متوقع ہے۔

قومی مرکز برائے موسمیات نے عوام سے اپیل کی ہے کہ وہ موسمی صورتحال سے متعلق تازہ ترین اطلاعات، رپورٹس اور وارننگز کے لیے اس کے ویب سائٹ، 'انواء' ایپ اور سوشل میڈیا اکاؤنٹس پر نظر رکھیں۔

مرکز نے خاص طور پر ان علاقوں میں جہاں شدید بارش اور سیلاب کا امکان ہے، جاری کردہ ہدایات اور تنبیہات پر عمل کرنے کی اہمیت پر زور دیا ہے۔