اسرائیلی فوج کی سخت شرائط پر بین الاقوامی فورس کی غزہ میں تعیناتی کی منظوری

عبرانی میڈیا کے مطابق اسرائیلی فوج نے غزہ میں کثیر القومی بین الاقوامی فورس کی تعیناتی کی مشروط منظوری دے دی ہے، تاہم اس کے لیے شرط رکھی گئی ہے کہ فی الحال تعمیر نو کا عمل شروع نہ کیا جائے۔

اسرائیلی فوجی ریڈیو نے واضح کیا ہے کہ ان شرائط میں یہ بھی شامل ہے کہ اسرائیل جن ممالک کو دشمن تصور کرتا ہے، جیسے ترکی اور قطر، انہیں اس بین الاقوامی فورس میں شامل ہونے کی اجازت نہیں ہوگی۔

ادھر وزیر اعظم بنیامین نیتن یاہو کے دفتر کے ایک عہدیدار نے بتایا کہ غزہ میں امن کونسل اور بین الاقوامی فورس کی تعیناتی کی اسرائیلی منظوری ٹرمپ منصوبے میں بھی شامل ہے۔

عہدیدار نے مزید کہا کہ اسرائیلی فوج اس وقت تک غزہ کے 'پیلی لائن' والے علاقے پر کنٹرول برقرار رکھے گی جب تک حماس اور غزہ کو غیر مسلح نہیں کیا جاتا، جبکہ کابینہ نے فیصلہ کیا ہے کہ صرف اسرائیل کو یہ اختیار ہوگا کہ وہ کن ممالک کو غزہ میں فورس بھیجنے کی اجازت دے۔