امریکہ کی ایران پر فوری حملے پر غور، اسرائیل میں ہائی الرٹ

امریکی انتظامیہ ایران میں توانائی اور بنیادی ڈھانچے کی تنصیبات پر ایک اور حملے پر غور کر رہی ہے، جبکہ اسرائیل نے کسی بھی ممکنہ عسکری تصادم کے خدشے کے پیش نظر ہائی الرٹ جاری کر دیا ہے۔ یہ پیش رفت واشنگٹن اور تہران کے درمیان جاری کشیدگی کے دوران سامنے آئی ہے۔

امریکی ویب سائٹ 'اکسئیس' نے ایک امریکی عہدیدار کے حوالے سے بتایا کہ ایرانی حالیہ دنوں میں 'انتہائی جارحانہ' رہے ہیں، اور امریکی صدر ڈونلڈ ٹرمپ ایران میں توانائی کی تنصیبات کو نشانہ بنانے کے لیے فوری کارروائی کا حکم دینے پر غور کر رہے ہیں۔

رپورٹ کے مطابق، ممکنہ امریکی بمباری کا ہدف ایران کی توانائی اور بنیادی ڈھانچے کی تنصیبات ہوں گی، تاکہ ایران کو جنگ بندی مذاکرات میں امریکی شرائط ماننے پر مجبور کیا جا سکے۔

مزید کہا گیا ہے کہ ان حملوں میں اسرائیل کی شمولیت بھی ممکن ہے، جو کئی ہفتوں بعد پہلی بار ہو گی۔ رپورٹ میں خبردار کیا گیا ہے کہ اس اقدام سے ایران اسرائیل پر میزائل حملے کر سکتا ہے۔

اسرائیلی اخبار 'یدیعوت آحرونوت' نے ذرائع کے حوالے سے بتایا ہے کہ اسرائیلی فضائیہ نے فضائی دفاعی نظام کی ہائی الرٹ کر دی ہے۔

اسرائیلی چینل 12 کے مطابق، اسرائیل میں امریکی حملے کے خدشے کے پیش نظر الرٹ جاری ہے، جبکہ اندازہ ہے کہ امریکہ اسرائیل کی شمولیت کے بغیر بھی بڑا حملہ کر سکتا ہے۔

دوسری جانب، وائٹ ہاؤس نے اسرائیلی چینل 13 سے گفتگو میں کہا کہ 'ایران کو مذاکرات کی میز پر آنے تک بھاری قیمت چکانا ہو گی'۔