ایران کو چند ہفتوں میں چینی ساختہ میزائل سسٹمز ملنے کا امکان

خبر رساں ادارے رائٹرز نے ذرائع کے حوالے سے بتایا ہے کہ ایران کو آئندہ چند ہفتوں میں چین سے 400 تک کندھے پر نصب دفاعی میزائل سسٹمز کی پہلی کھیپ ملنے کی توقع ہے۔

ذرائع کے مطابق اس معاہدے کی مالیت 60 سے 70 ملین ڈالر کے درمیان ہے اور یہ ایران کی جانب سے اپنی قلیل فاصلے کی فضائی دفاعی صلاحیت کو مضبوط بنانے کی سب سے بڑی کوششوں میں سے ایک ہے، جو امریکہ اور اسرائیل کے ساتھ جاری کشیدگی کے بعد سامنے آئی ہے۔

رائٹرز کے مطابق، معاہدے میں 300 سے 400 چینی ساختہ دفاعی نظاموں کی خریداری شامل ہے، جن میں کیو ڈبلیو-12 اور ایف این-16 میزائل سسٹمز بھی شامل ہیں۔ یہ معاہدہ ہانگ کانگ میں قائم کمپنی چونگچنگ باوشانگ انٹرنیشنل انویسٹمنٹ کے ساتھ کیا گیا ہے، جو ذرائع کے مطابق ایرانی فریق اور چینی سپلائر کے درمیان ثالث کا کردار ادا کر رہی ہے۔

ذرائع نے خبردار کیا ہے کہ اگرچہ معاہدہ ہو چکا ہے، تاہم ترسیل کے شیڈول، مقدار اور دیگر تفصیلات میں تبدیلی ہو سکتی ہے۔ معاہدے کے تحت ابتدائی طور پر یہ سسٹمز چین کے مغربی شہر ارومچی سے فضائی راستے کے ذریعے پاکستان کے راستے ایران پہنچائے جائیں گے۔

واضح رہے کہ رائٹرز نے اس سے قبل بھی رپورٹ کیا تھا کہ ایران چین کے ساتھ ایک الگ معاہدے کے قریب ہے جس کے تحت اسے اینٹی شپ کروز میزائل مل سکتے ہیں، تاہم یہ واضح نہیں ہو سکا کہ یہ معاہدہ طے پایا ہے یا نہیں۔