امریکا نے یورپ میں فوجی موجودگی پر نظرثانی کا آغاز کر دیا

امریکا نے پیر کے روز اعلان کیا ہے کہ وہ یورپ میں اپنی فوجی موجودگی کا جائزہ لینے کا عمل شروع کر رہی ہے۔ یہ اقدام امریکی وزیر دفاع پیٹ ہیگسیث کی جانب سے جون میں نیٹو وزرائے دفاع کے اجلاس میں دیے گئے بیانات کے تسلسل میں سامنے آیا ہے، جس میں یورپی براعظم میں امریکی افواج کی تعیناتی کے مستقبل پر بات کی گئی تھی۔

امریکی محکمہ دفاع (پینٹاگون) کے نائب سیکریٹری، ایلبرج کلبی نے ایکس پلیٹ فارم پر اپنے پیغام میں کہا کہ یہ جائزہ "حقیقی" ہوگا اور اس کا مقصد یہ ہے کہ نیٹو تیزی سے اور ناقابل واپسی طور پر یورپ کو اپنے روایتی دفاع کی بنیادی ذمہ داری سنبھالنے کی طرف لے جائے، جیسا کہ اس وقت وزیر دفاع نے اعلان کیا تھا۔

کلبی نے مزید کہا کہ اس جائزے کے نتائج نیٹو کو "زیادہ مضبوط، منصفانہ اور پائیدار اتحاد" میں تبدیل کرنے کے عمل کو تیز کریں گے۔

یہ اقدام ایسے وقت میں سامنے آیا ہے جب امریکا نے ان یورپی ممالک پر تنقید کی ہے جنہوں نے ایران کے خلاف جنگ کے دوران اپنی سرزمین پر موجود نیٹو اڈوں کے استعمال کی امریکی افواج کو اجازت دینے سے انکار کیا تھا۔

اس سے قبل امریکی وزیر دفاع یہ عندیہ بھی دے چکے ہیں کہ اگر بعض ممالک نے گزشتہ سال دی ہیگ میں ہونے والی نیٹو سربراہی کانفرنس میں طے شدہ وعدوں پر عمل نہ کیا تو امریکا نیٹو کے بجٹ میں اپنی شراکت کم کر سکتا ہے۔

یاد رہے کہ اس کانفرنس میں نیٹو ممالک کے رہنماؤں نے سن 2035 تک اپنے مجموعی قومی پیداوار کا کم از کم 5 فیصد سکیورٹی اخراجات کے لیے مختص کرنے کا عہد کیا تھا، جس میں سے 3.5 فیصد خالصتاً عسکری اخراجات کے لیے مخصوص ہوگا۔