امریکی بحری محاصرے میں 44 تجارتی جہازوں کا راستہ بدلا گیا

امریکی سینٹرل کمانڈ نے اعلان کیا ہے کہ ایران پر بحری محاصرے کے دوران 44 تجارتی جہازوں کا راستہ تبدیل کیا گیا جبکہ 4 دیگر جہازوں کو روکا اور ان کی تلاشی لی گئی۔

یہ کارروائیاں امریکی فورسز کی جانب سے ایران پر عائد بحری محاصرے کے نفاذ کے سلسلے میں کی جا رہی ہیں، جبکہ اس دوران خلیج ہرمز سے گزرنے والے جہازوں پر ایرانی حملوں یا امریکی محاصرہ توڑنے کی ایرانی کوششوں کے خدشات کے پیش نظر ہائی الرٹ جاری ہے۔

امریکی صدر ڈونلڈ ٹرمپ نے ایران کے خلاف ایک بڑی فوجی کارروائی روکنے کا فیصلہ کیا ہے تاکہ مذاکرات کا راستہ دوبارہ کھولا جا سکے اور خطے کو فوجی کشیدگی کے اثرات سے بچایا جا سکے۔

ادھر سلطنت عمان ایران کے ساتھ مشاورت کر رہی ہے تاکہ امریکہ اور ایران کے درمیان براہ راست مذاکرات کی راہ ہموار کی جا سکے، جبکہ مذاکرات کے لیے واشنگٹن اور تہران کے درمیان اعتماد کی بحالی ضروری قرار دی گئی ہے۔