ایران میں حکومت مخالف احتجاجات پر دو افراد کو پھانسی

ایرانی عدلیہ نے حکومت مخالف احتجاجات سے منسلک الزامات کے تحت دو افراد کو پھانسی دینے کا اعلان کیا ہے، جبکہ میڈیا رپورٹس کے مطابق یہ سزا ایک عوامی مقام پر دی گئی۔

ایرانی عدلیہ سے وابستہ خبر رساں ایجنسی 'میزان' کے مطابق "ابوالفضل سباہی اور امیر حسین صفاری کو آج صبح پھانسی دی گئی۔"

ایرانی خبر رساں ادارے 'مہر' کے مطابق دونوں افراد کو ملک کے وسطی شہر اصفہان کے علاقے ملک شہر کے ایک چوک میں متعدد افراد کی موجودگی میں پھانسی دی گئی۔

رپورٹ کے مطابق ان افراد پر آٹھ جنوری کو پولیس اہلکاروں پر تلواروں اور چاقوؤں سے حملہ کرنے، انہیں سڑک کے اشاروں کے کھمبوں سے باندھنے، زمین پر گھسیٹنے، ان پر پٹرول ڈال کر آگ لگانے کا الزام تھا۔

ان پر دیگر الزامات میں "اسلحہ لے کر خوف و ہراس پھیلانا" (جسے ایران میں 'محاربہ' کہا جاتا ہے) اور "ملک میں امن و امان کو شدید نقصان پہنچانا" شامل ہیں۔