امریکی اقدامات کے جواب میں چین کی امریکی اداروں پر پابندیاں

امریکہ کی حالیہ پابندیوں کے جواب میں چین نے امریکی ایجنسیوں اور دیگر اداروں پر نئی پابندیاں عائد کر دی ہیں۔ یہ اقدام اس وقت سامنے آیا ہے جب امریکہ نے چینی ٹیلی کمیونیکیشن کمپنیوں، لیبارٹریز، ڈرون سیکٹر اور دیگر ٹیکنالوجی مصنوعات کو نشانہ بنایا تھا۔

یہ اقدامات امریکہ اور چین کے درمیان تجارت اور ٹیکنالوجی کے شعبوں میں بڑھتے ہوئے تناؤ کا تازہ ترین اظہار ہیں۔ واشنگٹن نے چین کی امریکی ٹیکنالوجی اور مارکیٹ تک رسائی پر سکیورٹی اور انسانی حقوق کے خدشات کے پیش نظر مزید سختیاں عائد کی ہیں۔

خبر رساں ادارے رائٹرز کے مطابق، بیجنگ نے یہ بھی نشاندہی کی ہے کہ گزشتہ ہفتے واشنگٹن نے 40 سے زائد چینی اداروں کو ایغور جبری مشقت کے انسداد کے قانون کی فہرست میں شامل کیا ہے۔

جواباً چین نے امریکی صنعتی سپلائی چین کے لیے اہم اشیا اور نایاب ارضی عناصر کی برآمدات پر کنٹرول عائد کر دیے ہیں، اور ان امریکی کمپنیوں پر بھی پابندیاں لگائی ہیں جن کے بارے میں اس کا خیال ہے کہ وہ واشنگٹن کی مدد کر رہی ہیں یا اس پر چین مخالف دباؤ ڈال رہی ہیں۔

آج بیجنگ نے سات امریکی اداروں پر کاروباری سرگرمیوں کی پابندی عائد کی ہے، امریکہ کو ڈرون برآمد کرنے کے عمل کی جانچ مزید سخت کر دی ہے اور امریکی ایجنسیوں سے بعض معیاری جانچ اور معائنہ کی خدمات لینا بند کر دی ہیں، جو چینی معیار اور سیفٹی کے مطابق لازمی تھیں۔

چین نے یہ بھی اعلان کیا ہے کہ امریکہ کو برآمد کیے جانے والے ڈرونز، ان کے اہم پرزہ جات اور متعلقہ ٹیکنالوجی اب ہر کیس کی بنیاد پر سخت جانچ کے بعد ہی برآمد کی جائیں گی اور انہیں لائسنس کی سہولت حاصل نہیں ہوگی۔