نمک کا مکمل ترک کرنا صحت کے لیے نقصان دہ ہے، ماہرین

ماہر امراض قلب اور بلڈ پریشر، ڈاکٹر صالح الغامدی نے خبردار کیا ہے کہ احتیاطاً نمک کا مکمل طور پر ترک کرنا صحت کے لیے نقصان دہ ثابت ہو سکتا ہے۔

انہوں نے اپنے ایکس اکاؤنٹ پر وضاحت کی کہ اس کے نتیجے میں اچانک کمزوری، دل کی دھڑکن میں اضافہ، سردی کا احساس اور طویل بیٹھنے کے بعد کھڑے ہونے پر چکر آنا جیسی علامات ظاہر ہو سکتی ہیں۔

ڈاکٹر الغامدی نے اس بات پر زور دیا کہ جسم کو خون کی روانی اور سیال مادوں کے توازن کے لیے سوڈیم کی ضرورت ہوتی ہے۔ ان کا کہنا تھا کہ دل، گردوں اور شریانوں کے لیے سب سے بڑا خطرہ معتدل نمک نہیں بلکہ پراسیسڈ غذائیں جیسے چپس، پراسیسڈ گوشت، شوگر اور چھپی ہوئی چینی، اور ہائیڈروجنیٹڈ آئل ہیں۔

انہوں نے کہا کہ دانشمندانہ احتیاط کا مطلب یہ ہے کہ نمک کا استعمال معتدل رکھا جائے اور نمکین اشیا کم کی جائیں، نہ کہ مکمل طور پر ترک کر دیا جائے۔