ستمبر سے 4 کروڑ 90 لاکھ افراد کو شدید بھوک کا خطرہ

عالمی ادارہ خوراک نے خبردار کیا ہے کہ النینو کا موسمی رجحان دنیا بھر میں لاکھوں افراد کی غذائی سلامتی کے لیے بڑا خطرہ ہے اور اس کے شدت اختیار کرنے سے دنیا کے سب سے زیادہ کمزور طبقات میں تقریباً 5 کروڑ افراد شدید بھوک کا شکار ہو سکتے ہیں، جس کا مطلب ہے کہ وہ اپنی روزمرہ غذائی ضروریات پوری کرنے سے قاصر ہوں گے۔
اقوام متحدہ کے میڈیا سینٹر کے مطابق، ادارہ خوراک اور اس کے شراکت دار آٹھ ممالک میں اپنی کوششیں تیز کر رہے ہیں تاکہ ان کمزور آبادیوں کی مدد کی جا سکے جو پہلے ہی غربت، تنازعات، بے روزگاری اور موسمیاتی آفات کا سامنا کر رہی ہیں۔ ترجیحات میں سیلاب، خشک سالی اور طوفانوں کے لیے پیشگی تیاری شامل ہے۔
ادارہ خوراک کے قائم مقام ایگزیکٹو ڈائریکٹر کارل سکاو کے مطابق، النینو کا رجحان پہلے سے ہی کمزور لاکھوں افراد کی غذائی سلامتی کے لیے بڑا خطرہ ہے۔ جتنی جلدی ہم متاثرہ خاندانوں کو موسمیاتی جھٹکوں کے لیے تیار کریں گے، اتنی ہی زیادہ جانیں بچا سکیں گے اور روزگار کے ذرائع محفوظ رہیں گے۔
ادارہ خوراک کے مطابق، ستمبر سے النینو کے باعث تقریباً 4 کروڑ 90 لاکھ مزید افراد کو شدید بھوک کا سامنا کرنا پڑ سکتا ہے، جبکہ شدید غذائی عدم تحفظ کے شکار افراد کی تعداد میں 22 فیصد اضافہ ہو کر یہ تعداد 22 کروڑ 50 لاکھ سے 27 کروڑ 40 لاکھ تک پہنچ سکتی ہے۔ وسطی امریکہ اور جنوبی افریقہ ان علاقوں میں شامل ہیں جہاں اس رجحان کے سب سے زیادہ اثرات متوقع ہیں۔ قبل از وقت اقدامات سے فائدہ ہوتا ہے، کیونکہ ہر ایک ڈالر کی سرمایہ کاری سے 3 سے 7 ڈالر کی مستقبل کی بچت ہو سکتی ہے۔
ادارہ خوراک نے بتایا کہ 2015-2016 میں النینو نے 6 سے 10 کروڑ افراد کی غذائی سلامتی کو متاثر کیا تھا۔ ابتدائی اندازوں کے مطابق، 2026-2027 میں النینو کے باعث سال کے آخر تک کم از کم 4 کروڑ 90 لاکھ مزید افراد شدید غذائی عدم تحفظ کا شکار ہو سکتے ہیں۔
45 ایسے ممالک کا تجزیہ کرنے کے بعد، جہاں پہلے ہی شدید غذائی عدم تحفظ ہے اور جہاں اس رجحان کے باعث بارش، درجہ حرارت، سیلاب اور خشک سالی کے پیٹرن متاثر ہو سکتے ہیں، ادارے نے اندازہ لگایا ہے کہ متاثرہ افراد کی تعداد 22 کروڑ 50 لاکھ سے بڑھ کر 27 کروڑ 40 لاکھ ہو سکتی ہے، یعنی تقریباً 22 فیصد اضافہ۔
توقع ہے کہ وسطی امریکہ اور جنوبی افریقہ کے بعض علاقے موسمیاتی شدت کے سب سے زیادہ اثرات برداشت کریں گے، جبکہ مشرقی افریقہ اور جنوب مشرقی ایشیا بھی شدید متاثر ہو سکتے ہیں۔
ادارہ خوراک نے واضح کیا کہ النینو کے اثرات ہر ملک میں مختلف ہوں گے؛ کچھ ممالک میں غیر معمولی بارشیں، سیلاب اور شدید گرمی ہو سکتی ہے، جبکہ دیگر ممالک میں اگلے کاشت اور فصل کے موسم میں حالات مزید خراب ہو سکتے ہیں۔
ادارہ خوراک کی رپورٹ کے مطابق، لاطینی امریکہ اور کیریبین میں غذائی عدم تحفظ میں سب سے زیادہ اضافہ ہو سکتا ہے، جہاں 1 کروڑ 60 لاکھ سے زائد افراد متاثر ہونے کا خدشہ ہے۔ وسطی امریکہ میں غذائی عدم تحفظ میں سب سے زیادہ، یعنی 83.1 فیصد اضافہ متوقع ہے۔
مشرقی اور جنوبی افریقہ میں بھی خطرات زیادہ ہیں، خاص طور پر ان علاقوں میں جو آنے والے بارشوں کے موسم پر خوراک کی پیداوار کے لیے انحصار کرتے ہیں۔ یہاں 1 کروڑ 80 لاکھ سے زائد افراد کا غذائی تحفظ متاثر ہو سکتا ہے، جو 26 فیصد اضافہ ہے۔ جنوبی افریقہ کے ممالک سب سے زیادہ متاثر ہو سکتے ہیں کیونکہ یہاں زیادہ تر گھرانے بارانی زراعت پر انحصار کرتے ہیں۔
ایشیا اور پیسیفک میں بھی اس رجحان کے باعث کئی کمزور ممالک میں غذائی عدم تحفظ بڑھ سکتا ہے اور 82 لاکھ افراد شدید بھوک کا شکار ہو سکتے ہیں۔ مغربی اور وسطی افریقہ میں بھی خطرہ ہے، جہاں غذائی عدم تحفظ میں 12 فیصد اضافہ ہو کر 60 لاکھ مزید افراد متاثر ہو سکتے ہیں۔
ادارہ خوراک اور اقوام متحدہ کی تنظیم برائے خوراک و زراعت (ایف اے او) نے متاثرہ آبادیوں کی مدد کے لیے تعاون بڑھانے کی اپیل کی ہے تاکہ وہ النینو کے اثرات سے نمٹنے، جانیں بچانے اور غذائی تحفظ کو یقینی بنانے کے لیے تیار ہو سکیں۔
توقع ہے کہ النینو ستمبر سے دسمبر کے درمیان اپنے عروج پر پہنچے گا، تاہم اس کے اثرات 2027 تک کئی ممالک میں جاری رہیں گے کیونکہ فصلوں پر اس کے اثرات برقرار رہیں گے۔ ادارہ خوراک نے ایف اے او اور اقوام متحدہ کے دفتر برائے انسانی امور کے ساتھ مل کر 50 سے زائد ممالک میں حفاظتی منصوبے تیار کیے ہیں اور حکومتوں و مقامی آبادیوں کی مدد کر رہا ہے تاکہ خطرات کم کیے جا سکیں۔