گیارہ روزمرہ عادات جو مردوں میں ٹیسٹوسٹیرون پر اثرانداز ہوتی ہیں

ٹیسٹوسٹیرون مردانہ ہارمون ہے جو پٹھوں کی مضبوطی، ہڈیوں کی صحت اور تولیدی صلاحیت کے لیے بنیادی حیثیت رکھتا ہے، اور ماہرین غدد کے مطابق اس پر کئی روزمرہ عادات اور عوامل اثرانداز ہوتے ہیں۔

ماہرین نے امریکی اخبار "واشنگٹن پوسٹ" میں شائع رپورٹ میں بتایا کہ چالیس سال کی عمر کے بعد ٹیسٹوسٹیرون کی سطح سالانہ 1 سے 2 فیصد تک کم ہو سکتی ہے، تاہم اگر مرد حضرات موٹاپے اور دائمی بیماریوں سے بچیں تو عموماً ان کی ہارمون کی سطح معمول پر رہتی ہے۔

1- عمر میں اضافہ

چالیس سال کے بعد ٹیسٹوسٹیرون کی سطح میں بتدریج کمی آتی ہے، جو سالانہ 1 سے 2 فیصد تک ہو سکتی ہے۔

تاہم ماہرین کا کہنا ہے کہ اگر صحت برقرار رکھی جائے اور موٹاپے یا دائمی امراض سے بچا جائے تو زیادہ تر مردوں میں ہارمون کی سطح معمول پر رہتی ہے۔

2- نیند کی کمی

نیند کے دوران ہارمون کی پیداوار بڑھتی ہے، اس لیے نیند کی کمی یا بے قاعدگی اس کی سطح کو کم کر سکتی ہے۔

اسی وجہ سے نیند کی کمی یا اس میں خلل ٹیسٹوسٹیرون کی سطح میں کمی کا باعث بنتی ہے اور اس سے مردانہ کمزوری اور تولیدی مسائل کا خطرہ بھی بڑھ جاتا ہے۔

3- ٹیسٹ کا وقت

ٹیسٹوسٹیرون کی سطح صبح کے وقت، عموماً چھ سے سات بجے کے درمیان، سب سے زیادہ ہوتی ہے اور شام تک بتدریج کم ہو جاتی ہے۔

اسی لیے زیادہ درست نتائج کے لیے ہارمون کا ٹیسٹ صبح سات سے دس بجے کے درمیان کرانا بہتر ہے۔

4- موسم

کچھ مطالعات کے مطابق گرمیوں میں ٹیسٹوسٹیرون کی سطح سردیوں کے مقابلے میں زیادہ ہو سکتی ہے، شاید اس کی وجہ زیادہ دھوپ اور جسمانی سرگرمی ہے۔

5- نئی پدری ذمہ داریاں

بچے کی پیدائش کے بعد مردوں میں عارضی طور پر ٹیسٹوسٹیرون کی سطح کم ہو سکتی ہے۔ ماہرین کے مطابق یہ ایک حیاتیاتی ردعمل ہے جو والد کو بچے کی دیکھ بھال کے لیے تیار کرتا ہے، اس کے ساتھ ساتھ نیند کی کمی اور اس مرحلے کے دباؤ کا بھی اثر ہوتا ہے۔

6- ورزش میں زیادتی

معتدل ورزش، خصوصاً ریزسٹنس ایکسرسائز، عارضی طور پر ٹیسٹوسٹیرون میں اضافہ کرتی ہے، لیکن بہت زیادہ یا شدید ورزش اس کے برعکس اثر ڈال سکتی ہے اور ہارمون کی سطح کم ہو سکتی ہے۔

7- غذائی عادات

متوازن غذا اور صحت مند وزن برقرار رکھنا ٹیسٹوسٹیرون کی سطح کے لیے معاون ہے۔

ماہرین کے مطابق سبزیاں، پھل، اجناس اور صحت مند پروٹین پر مشتمل غذا اور مناسب وزن ہارمون کی قدرتی سطح کو برقرار رکھنے میں مددگار ہے۔

8- الکحل کا استعمال

الکحل کا زیادہ استعمال ٹیسٹوسٹیرون کی سطح کم کرتا ہے اور اس کے ساتھ ساتھ تولیدی صحت اور جنسی کارکردگی پر بھی منفی اثر ڈالتا ہے۔

9- دائمی ذہنی دباؤ

مسلسل ذہنی دباؤ ہارمون کے توازن کو متاثر کر کے ٹیسٹوسٹیرون کی سطح کم کر سکتا ہے، اور اس سے تولیدی صحت اور جنسی کارکردگی بھی متاثر ہوتی ہے۔

10- بعض ادویات

کچھ ادویات جیسے اوپیوئڈ پین کلرز، کورٹیسون، اینابولک سٹیرائڈز اور پروسٹیٹ کینسر کی کچھ تھیراپیز ٹیسٹوسٹیرون کی پیداوار کو کم کر سکتی ہیں۔

11- کھیل میں جیت یا ہار

کچھ محدود مطالعات کے مطابق کھیلوں کے شائقین میں جیت کی صورت میں ٹیسٹوسٹیرون کی سطح بڑھ سکتی ہے اور ہارنے پر کم ہو سکتی ہے، تاہم اس حوالے سے سائنسی شواہد ابھی محدود ہیں۔