کیا گرم کڑکدہ فشار خون بڑھاتا اور ٹھنڈا کم کرتا ہے؟ ماہر کی وضاحت

ماہر امراض فشار خون ڈاکٹر صالح الغامدی نے کہا ہے کہ کڑکدہ کے گرم یا ٹھنڈے ہونے سے بلڈ پریشر پر مختلف اثرات کی بات عام ہے، مگر یہ درست نہیں۔

انہوں نے اپنے ایکس اکاؤنٹ پر وضاحت کی کہ کڑکدہ بلڈ پریشر کم کرنے میں مددگار ہو سکتا ہے اور بعض مطالعات کے مطابق اس کے باقاعدہ استعمال سے فشار خون میں اوسطاً 6 سے 7 درجے تک کمی آ سکتی ہے، خاص طور پر ان افراد میں جو پہلے ہی ہائی بلڈ پریشر کے مریض ہیں۔

الغامدی کے مطابق اس کی وجہ یہ ہے کہ کڑکدہ میں اینتھوسیانین اور پولی فینولز جیسے مرکبات پائے جاتے ہیں جو خون کی شریانوں کو پھیلانے اور دوران خون کو بہتر بنانے میں مدد دیتے ہیں، جبکہ اس کا معمولی پیشاب آور اثر بھی ہو سکتا ہے۔

انہوں نے مزید کہا کہ اس بات کا کوئی معتبر سائنسی ثبوت یا تحقیق موجود نہیں کہ گرم یا ٹھنڈے کڑکدہ کے اثرات میں فرق ہو۔ ان کا کہنا تھا کہ سب سے اہم بات یہ ہے کہ کڑکدہ قدرتی اور بغیر چینی کے استعمال کیا جائے اور روزانہ ایک سے دو کپ تک محدود رکھا جائے۔ تاہم کڑکدہ بلڈ پریشر کی ادویات کا متبادل نہیں اور اس کی وجہ سے علاج بند نہیں کرنا چاہیے۔