بھارت کا مارک زکربرگ سے تین دن میں معافی کا مطالبہ

بھارتی پارلیمانی کمیٹی برائے انفارمیشن ٹیکنالوجی نے میٹا کے چیف ایگزیکٹو مارک زکربرگ کو وزیر اعظم نریندر مودی کی ویڈیو انسٹاگرام سے ہٹانے پر تین دن میں ذاتی معافی مانگنے کی مہلت دی ہے۔

بھارتی لوک سبھا کی سیکریٹریٹ کے مطابق اگر زکربرگ مقررہ مدت میں غیر مشروط معافی نہیں مانگتے تو میٹا کے پلیٹ فارمز کو انفارمیشن ٹیکنالوجی قانون کے تحت حاصل قانونی تحفظ واپس لیا جا سکتا ہے اور انہیں بطور ناشر قانونی کارروائی کا سامنا کرنا پڑ سکتا ہے۔

لوک سبھا سیکریٹریٹ کی جانب سے وزارت الیکٹرانکس و انفارمیشن ٹیکنالوجی کو لکھے گئے خط میں کہا گیا کہ پارلیمانی کمیٹی نے وزیر اعظم کی اس ویڈیو کو ہٹانے کو انتہائی سنگین قرار دیا ہے، جس میں انہوں نے امتحانات کے پرچے لیک ہونے اور اس کے تدارک کے اقدامات پر طلبہ و نوجوانوں سے خطاب کیا تھا۔ ویڈیو پانچ سے چھ گھنٹے کے لیے ہٹائی گئی تھی۔ کمیٹی نے مارک زکربرگ سے ذاتی معافی کا مطالبہ کیا ہے۔

کمیٹی نے اس کے ساتھ ساتھ ان پلیٹ فارمز کے خلاف بھی کارروائی کا مطالبہ کیا ہے جو بچوں سے جنسی زیادتی یا خواتین کی توہین پر مبنی مواد کی میزبانی کرتے ہیں۔

یہ سب اس کے باوجود ہوا کہ میٹا کے عالمی امور کے سربراہ جوئل کیپلن نے بھارتی وزیر انفارمیشن ٹیکنالوجی اشوینی ویشنو کی زیر صدارت اجلاس میں وزیر اعظم نریندر مودی کی انسٹاگرام ویڈیو عارضی طور پر ہٹانے پر کمپنی کی جانب سے معافی پیش کی تھی۔

میٹا نے وضاحت کی ہے کہ 'ویڈیو کو ہٹانا غیر ارادی غلطی تھی' اور کمپنی اس طرح کی غلطیوں سے بچنے کے لیے داخلی نگرانی اور جائزے کے اقدامات کو مضبوط بنا رہی ہے۔

کیپلن نے اپنے بیان میں کہا: 'میں نے وزیر سے میٹا کی جانب سے اس غلطی پر معذرت پیش کی ہے جس کے باعث وزیر اعظم مودی کی پوسٹ محدود ہوئی۔'