ایئربس نے آسٹریلیا سے فرانس تک 24 گھنٹے کی ریکارڈ پرواز مکمل کی

ایئربس اے 350 ماڈل کا خصوصی طور پر تیار کردہ طیارہ منگل کے روز فرانس میں اترا، جس نے آسٹریلیا سے فرانس تک 24 گھنٹے اور 24 منٹ کی ریکارڈ ساز آزمائشی پرواز مکمل کی۔ یہ طیارہ آئندہ سال 'کوانتاس' کے بیڑے میں شامل ہوگا۔

یہ پرواز، جس نے تین براعظموں اور دو سمندروں کو عبور کرتے ہوئے 23,076 کلومیٹر کا فاصلہ طے کیا اور دوران سفر دو بار سورج غروب اور طلوع ہوتے دیکھا، فلائٹ ریڈار 24 ویب سائٹ پر سب سے زیادہ دیکھی جانے والی پروازوں میں شامل رہی۔

یہ پرواز 'کوانتاس' کے لیے ایک اہم سنگ میل ثابت ہوئی، جو اپریل میں اپنی پہلی طویل فاصلے کی اے 350-1000 طیارہ وصول کرے گی، جس کے بعد مزید 11 طیارے آئیں گے۔ یہ طیارے آسٹریلیا کو براہ راست امریکہ اور یورپ کے شہروں سے جوڑیں گے۔

گزشتہ ہفتے آزمائشی طیارے نے تولوز سے میلبورن تک 17,000 کلومیٹر کا فاصلہ 19 گھنٹے 12 منٹ میں طے کیا تھا، جبکہ واپسی کی پرواز میں وہی راستہ اختیار کیا گیا جو کمرشل سروس میں استعمال ہوگا۔

کوانتاس نے اکتوبر 2027 سے لندن اور سڈنی کے درمیان براہ راست پروازیں شروع کرنے کا منصوبہ بنایا ہے، جس کے بعد سڈنی اور نیویارک کے درمیان بھی یہی سہولت فراہم کی جائے گی۔

واضح رہے کہ اس وقت دنیا کی سب سے طویل باقاعدہ کمرشل پرواز سنگاپور ایئرلائنز کی سنگاپور سے نیویارک تک ہے، جو 15,350 کلومیٹر کا فاصلہ 18 گھنٹے سے زائد میں طے کرتی ہے اور اس میں بھی ایئربس اے 350 کا ایک اور ماڈل استعمال ہوتا ہے۔