ابتدائی دو برس میں کم چینی دماغی صحت کے لیے مفید: تحقیق

ایک حالیہ سائنسی تحقیق میں انکشاف ہوا ہے کہ زندگی کے ابتدائی دو برسوں میں بہت کم مقدار میں چینی استعمال کرنے سے عمر کے بڑھنے پر ڈیمنشیا (خرف) کے خطرے میں کمی آ سکتی ہے۔ تحقیق کے مطابق جن افراد نے بچپن میں چینی کا استعمال محدود رکھا، ان میں خرف کا خطرہ 23 فیصد کم پایا گیا۔

یہ تحقیق ہانگ کانگ یونیورسٹی آف سائنس اینڈ ٹیکنالوجی کے محققین نے کی، جس میں برطانیہ کے "بایو بینک" منصوبے کے تحت 65 ہزار افراد کے ڈیٹا کا تجزیہ کیا گیا۔ اس تحقیق کا مقصد ابتدائی عمر میں چینی کے استعمال اور بڑھاپے میں دماغی صحت کے درمیان تعلق کا جائزہ لینا تھا۔

تحقیقی ٹیم کے رکن، جیاچن چینگ نے واضح کیا کہ نتائج سے ظاہر ہوتا ہے کہ زندگی کے بالکل ابتدائی مراحل میں چینی کی مقدار کم کرنے سے دماغی صحت پر طویل المدتی مثبت اثرات مرتب ہو سکتے ہیں۔ تاہم، انہوں نے اس تعلق کو بہتر طور پر سمجھنے کے لیے مزید تحقیق کی ضرورت پر زور دیا۔

ماہرین نے کہا ہے کہ یہ تحقیق ابتدائی غذائی عادات اور مستقبل کی صحت کے درمیان اہم اشارے فراہم کرتی ہے، تاہم یہ ثابت نہیں کرتی کہ چینی کم کرنے سے براہ راست خرف سے بچا جا سکتا ہے۔ ماہرین نے دماغی صحت کے لیے متوازن اور صحت مند غذا اپنانے کی اہمیت پر بھی زور دیا۔